ផ្អើលនាំគ្នាទៅ មើលពស់ថ្លាន់ អ្នកខ្លះសុំសេចក្តីសុខ អ្នកខ្លះសុំ លេខឆ្នោត

ផ្អើលនាំគ្នាទៅ មើលពស់ថ្លាន់ អ្នកខ្លះសុំសេចក្តីសុខ អ្នកខ្លះសុំ លេខឆ្នោត

ខេត្តកំពង់ចាម ៖ ពស់ថ្លាន់មួយក្បាល ប្រវែងជាង២ម៉ែត្រ ទម្ងន់ជិត២០គីឡូក្រាម លូនចេញពីព្រៃ មកពួនសម្ងំក្នុងស្រែអ្នកភូមិបង្កឱ្យមានការភ្ញាក់ផ្អើល នាំគ្នាទៅមើលយ៉ាងច្រើនកុះករ មានអ្នកខ្លះសុំសេចក្តីសុខ អ្នកខ្លះសុំលេខឆ្នោត កាលពីវេលាម៉ោង ជាង១១ព្រឹកថ្ងៃទី១៨ កញ្ញា ២០១៥ នៅភូមិអ្នកតាស្នឹង ឃុំបឹងណាយ ស្រុកព្រៃឈរ ។

លោក ង៉ាន ជឿន មេឃុំបឹងណាយ បានឲ្យដឹងថា រូបលោកមិនដឹងច្បាស់ថា ពស់ថ្លាន់១ក្បាលធំនេះលូនចេញពីព្រៃកន្លែងណាមួយច្បាស់លាស់នោះទេ ដោយមកសម្ងំលាក់ខ្លួននៅ ក្នុងស្រែរបស់អ្នកភូមិបែបនេះ ពួកគាត់ក៏នាំគ្នាសែងលើកមកដាក់ នៅជាប់នឹងផ្លូវលំតែម្តង ។

លោកមេឃុំបឹងណាយ បានបន្តថា ដំបូងអ្នកស្រុកបានទៅ មើលមានគ្នាតិចតួចទេ តែការនិយាយពី មាត់មួយទៅមាត់មួយឮតៗគ្នា ក៏ផ្អើលនាំគ្នាជិះកង់ ម៉ូតូមកចោមរោម មើលជាបន្តបន្ទាប់ តែមិនមានអ្នកណា ម្នាក់មានគំនិតអាក្រក់ចង់ចាប់ពស់ថ្លាន់១ក្បាល នេះយកទៅលក់នោះទេ ។ ក្រោយពីដំណឹងនេះបាន លេចឮដល់រូបលោកនោះ ក៏ប្រញាប់ទៅមើលនិងជួយការពារ មិនឲ្យបុគ្គលម្នាក់ប៉ះពាល់ឡើយ ថែមទាំងបានចាត់ឲ្យ លោកមេភូមិអ្នកតាស្នឹងនៅចាំទីនេះ មានអ្នកខ្លះបួងសួងសុំសេចក្តីសុខ និងមួយចំនួនទៀតដែល ញៀននឹងល្បែងស៊ីសង ក៏បានសុំលេខឆ្នោត មិនទាន់ដឹងថាត្រូវឬខុសទេ ព្រោះឆ្នោតចេញនៅ ល្ងាចថ្ងៃទី១៨ កញ្ញា នេះ ។

ពស់ថ្លាន់មិនទាន់ដឹងថា ញី ឫឈ្មោលទេ ព្រោះមិនហ៊ានទៅ ឈ្ងោកមើលក្បែរ ក្មេងចាស់ ប្រុសស្រី ដែលនាំគ្នាមកមើល ក៏បាននិយាយថា កាលពីរដូវប្រាំងឆ្នាំ ទៅក៏ធ្លាប់លូនចេញមកឲ្យ អ្នកស្រុកបានឃើញដែរ ។ ក្រោយមក ក៏បានលូនចូលទៅក្នុងព្រៃវិញ លុះមកដល់ព្រឹកថ្ងៃទី១៨ កញ្ញា នេះ ក៏បានលូនចេញមកបង្ហាញខ្លួន ឃើញគ្រប់ៗគ្នាម្តងទៀត ។

លោក ង៉ាន ជឿន មេឃុំបឹងណាយ បានបញ្ជាក់ថា តាមការសន្និដ្ឋានពស់ថ្លាន់១ក្បាលនេះ សង្ស័យលូនចេញពីព្រៃ ស្ថិតនៅខាងលិចមានដំបូក និងព្រៃដុះទ្រុបទ្រុល ចម្ងាយប្រហែលជាង២០០ម៉ែត្រ ពីកន្លែងដែលប្រជាពលរដ្ឋនាំគ្នាភ្ញាក់ផ្អើលមើលនេះ ។

លោកបន្តថា ថ្លាន់មួយក្បាលនេះនឹងឲ្យលូន ទៅរស់នៅកន្លែងដើមវិញក្នុងព្រៃធម្មជាតិ ហើយបានហាមឃាត់មិនឲ្យពលរដ្ឋណាប៉ះពាល់ ឫមានបំណងអាក្រក់ឡើយ បើពុំនោះទេ អាចប្រឈមនឹងផ្លូវច្បាប់ ៕