កូនប្រុស អកតញ្ញូប៉ងសម្លាប់ ម្តាយនិងបងប្អូន យកទ្រព្យសម្បត្តិ នៅក្រុងសិរីសោភ័ណ

កូនប្រុស អកតញ្ញូប៉ងសម្លាប់ ម្តាយនិងបងប្អូន យកទ្រព្យសម្បត្តិ នៅក្រុងសិរីសោភ័ណ

ខេត្តបន្ទាយមានជ័យ ៖ ជនសង្ស័យម្នាក់ធ្លាប់ជាប់គុក ម្តងជាពីរដងរួចមកហើយពីរឿងក្លាហាន ខាងវាយតប់កាប់ចាក់បង្កឲ្យអ្នកដទៃរងរបួស ក្រោយចេញពីគុកមិនបានប៉ុន្មានផង លើកនេះបែរជាមានបំណង ប៉ងសម្លាប់ម្តាយ និងបងប្អូនដើម្បីយកទ្រព្យសម្បត្តិ ហើយត្រូវបានកម្លាំងនគរបាល ក្រុងសិរីសោភ័ណចាប់បញ្ជូន ចូលគុកវិញ ។ ហេតុការណ៍បង្កឲ្យមានការភ្ញាក់ផ្អើលនេះបានកើតឡើង កាលពីវេលាម៉ោង៥ល្ងាច ថ្ងៃទី២០ ខែកញ្ញា ឆ្នាំ២០១៥ នៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។

លោកអនុសេនីយ៍ឯក ប៊ុន តុល នាយផ្នែកព្រហ្មទណ្ឌ នៃអធិការដ្ឋាននគរបាល ក្រុងសិរីសោភ័ណបានឲ្យដឹងថា ជនសង្ស័យដែលត្រូវបាន ចាប់ឃាត់ខ្លួនឈ្មោះ ព្រឹម សាវ៉ាត ភេទប្រុស អាយុ៣៥ឆ្នាំ នៅភូមិកើតហេតុ ។ ជននេះសមត្ថកិច្ចធ្លាប់បានចាប់បញ្ជូនទៅសាលា ដំបូងខេត្តវិនិច្ឆ័យទោសចំនួន២ដង ហើយពីបទបង្ករបួសស្នាមលើអ្នកដទៃ តែនៅមិនរាងចាល ម្យ៉ាងជននេះគឺជាមនុស្សញៀនថ្នាំ និងស្រាទៀតផង ។

លោកអនុសេនីយ៍ឯក ប៊ុន តុល បន្តទៀតថា នៅថ្ងៃកើតហេតុ ជននេះបានផឹកស្រា ស្រវឹងយកកាំបិតប៉័ងតោ និងស្នាតេះ ដើររកបាញ់សម្លាប់ម្តាយ និងបងប្អូន ។ ក្រោយពីទទួលបានព័ត៌មានភ្លាម លោកបានដឹកនាំកម្លាំងចុះទៅចាប់ឃាត់ខ្លួនជនសង្ស័យរួម ទាំងដកហូតបានវត្ថុតាង កាំបិតប៉័ងតោ, ស្នាតេះ និងគ្រាប់ព្រួញ២ផងដែរ ។

នៅចំពោះមុខសមត្ថកិច្ច ជនសង្ស័យបានសារភាពថា គេប៉ងសម្លាប់ម្តាយឈ្មោះ សាយ សាវ៉ាត់ អាយុ៥៨ឆ្នាំ និងបងប្អូន ក៏ព្រោះតែគេចង់ បានកេរមរតកតែម្នាក់ឯង ។ លោកនាយផ្នែកក៏បានបញ្ជាក់ផងដែរ ជនសង្ស័យឈ្មោះ ព្រឹម សាវ៉ាត ត្រូវបានកម្លាំងជំនាញរបស់លោក កំពុងកសាងសំណុំរឿងបញ្ជូន ទៅកាន់ស្នងការដ្ឋាននគរបាលខេត្ត ដើម្បីចាត់ការបន្ត តាមនិតិវិធីច្បាប់ ៕