ចោរចូលផ្ទះលួចម៉ូតូ និងទូរស័ព្ទ២គ្រឿង ព្រឹកឡើងតាមរកម៉ូតូ ឃើញវិញតាមប្រព័ន្ធ GPS

ចោរចូលផ្ទះលួចម៉ូតូ និងទូរស័ព្ទ២គ្រឿង ព្រឹកឡើងតាមរកម៉ូតូ ឃើញវិញតាមប្រព័ន្ធ GPS

រាជធានីភ្នំពេញ ៖ ម៉ូតូម៉ាកហុងដាឌ្រីម សេ១២៥ ពណ៌ខ្មៅ១គ្រឿងដែល បានបាត់កាលពីយប់ ត្រូវបានម្ចាស់ និងសមត្ថកិច្ចតាមរកតាមរយៈប្រព័ន្ធ GPS ប្រទះឃើញនៅក្នុងបន្ទប់ផ្ទះ ជួលមួយកន្លែង និងម៉ូតូ៣គ្រឿងផ្សេងទៀត ដែលជារបស់ជនសង្ស័យ ជាមុខសញ្ញាចោរដៃស្អិតលួចយ៉ាងសកម្មម្នាក់ មានរហ័ស្សនាមថា «អាស្វា» នៅក្នុងសង្កាត់ផ្សារដើមថ្កូវ ចំណែកជនសង្ស័យរត់គេចខ្លួន បាត់នៅពេលដែលជនរងគ្រោះ និងកម្លាំងមានសមត្ថកិច្ចចុះទៅដល់ ។ ហេតុការណ៍នេះបានបង្ក ឱ្យមានការភ្ញាក់ផ្អើល កាលពីវេលាម៉ោង៨ និង១៥នាទីព្រឹក ថ្ងៃទី២១ ខែកញ្ញា ឆ្នាំ២០១៥ នៅក្នុងបន្ទប់ផ្ទះជួលគ្មាន លេខមួយកន្លែងស្ថិតនៅក្នុងសង្កាត់ ផ្សារដើមថ្កូវ ខណ្ឌចំកាមន ។

តាមប្រភពព័ត៌មានពីមន្ត្រី នគរបាលម្នាក់បានប្រាប់ឱ្យដឹងថា ម៉ូតូម៉ាកហុងដាឌ្រីម សេ១២៥ ព៌ណខ្មៅ ស៊េរីឆ្នាំ២០០៦ ពាក់ស្លាកលេខ ព្រៃវែង ១C-៣៧៤០ ត្រូវបានម្ចាស់តាមរកឃើញ តាមរយៈប្រព័ន្ធ GPS នៅក្នុងបន្ទប់ផ្ទះជួលមួយកន្លែងខាងលើ ដែលចោរលួចបានកាលពីយប់ ហើយយកទៅលាក់ទុក នៅក្នុងបន្ទប់ជួលរបស់ខ្លួន ។ ជនរងគ្រោះមានឈ្មោះ អ៊ុក សំខាន់ អាយុ៣២ឆ្នាំ ជនជាតិខ្មែរ មានប្តីជាជនជាតិបរទេស ស្នាក់នៅផ្ទះលេខ២២៧ ផ្លូវលេខ៦៣ ក្នុងសង្កាត់បឹងកេងកង ខណ្ឌចំការមន ត្រូវបានចោរឡើងរបងផ្ទះចូលទៅលួច យកបាត់ម៉ូតូ១គ្រឿងខាងលើ រួមទាំងទូរស័ព្ទដៃចំនួន២គ្រឿង និងលុយ២០០ដុល្លារអាមេរិក ទៀតផងកាលពីវេលាម៉ោង ប្រហែល៤ទៀបភ្លឺ ថ្ងៃទី២១ កញ្ញា ២០១៥នេះ ។

តាមប្រភពដដែល បានប្រាប់បន្តទៀតថា នៅយប់កើតហេតុនារីរងគ្រោះ បានចតម៉ូតូ និងចាក់សោទុកយ៉ាងត្រឹមត្រូវដូចសព្វមួយដង នៅខាងក្រោមផ្ទះ រួចហើយក៏ឡើងទៅសម្រាន្តនៅខាងលើ ។ លុះព្រឹកឡើងម៉ោង ប្រហែលជាជាង៥ព្រឹក ក៏បានភ្ញាក់ពីដំណេក ចេញមកក្រៅក៏បានឃើញទ្វាររបងផ្ទះ របស់ខ្លួនបើកចំហ និងបាត់ម៉ូតូដែលចតនៅខាងក្រៅនោះ ក៏មានការភ្ញាក់ផ្អើលកើតឡើង និងរត់ទៅដាក់ពាក្យបណ្តឹង នៅប៉ុស្តិ៍រដ្ឋបាលនគរបាលបឹងកេង កងទី១ភ្លាមៗ ។

ករណីចោរឡើងរបងចូលផ្ទះលួចម៉ូតូ មួយគ្រឿងដែលភ្ជាប់ប្រព័ន្ធ GPS យកទៅបាត់ រួមទាំងទូរស័ព្ទដៃចំនួន២គ្រឿង និងលុយ២០០ដុល្លារ ហើយលួចយកទាំងកូនសោរ របងទ្វារទៅបាត់កាលពីយប់នោះ លុះព្រឹកឡើងម្ចាស់ផ្ទះ រួមទាំងកម្លាំងនគរបាល ប៉ុស្តិ៍បឹងកេងកងទី១បានតាមរក តាមរយៈប្រព័ន្ធ GPS រកឃើញម៉ូតូរបស់ជនរងគ្រោះ ដែលត្រូវជនសង្ស័យកាច់ ស្លាកលេខចេញ រួមទាំងម៉ូតូ៣គ្រឿងទៀតនៅក្នុង បន្ទប់ជួលខាងលើនេះតែម្តង ចំណែកបុរសជាជនសង្ស័យដែល គេស្គាល់រហ័ស្សនាមថា «អាស្វា» បានរត់គេចខ្លួនបាត់ ។

ម៉ូតូម៉ាកហុងដាឌ្រីម សេ១២៥ ដែលបានរកឃើញ តាមរយៈប្រព័ន្ធ GPS នោះត្រូវបានកម្លាំង នគរបាលប៉ុស្តិ៍បឹងកេងកងទី១ ប្រគល់ឱ្យនារីរងគ្រោះវិញ ចំណែកឯម៉ូតូ៣គ្រឿងទៀត ត្រូវបានយកទៅរក្សាទុកនៅ អធិដ្ឋាននគរបាលខណ្ឌចំការមន ដើម្បីធ្វើការស្រាវជ្រាវរកម្ចាស់ ដែលបានបាត់ជាបន្តទៅទៀត ៕