អ្នកទោសខ្មែរ ម្នាក់ត្រូវអាជ្ញាធរ ថៃដោះលែង ប្រគល់ឱ្យ អាជ្ញាធរកម្ពុជាវិញ

អ្នកទោសខ្មែរ ម្នាក់ត្រូវអាជ្ញាធរ ថៃដោះលែង ប្រគល់ឱ្យ អាជ្ញាធរកម្ពុជាវិញ

ខេត្តឧត្តរមានជ័យ ៖ អាជ្ញាធរថៃបានធ្វើការ ដោះលែងអ្នកទោសខ្មែរម្នាក់ ឲ្យមានសេរីភាពយកមក ប្រគល់ឲ្យអាជ្ញាធរកម្ពុជា តាមមាត់ច្រកទ្វារអន្តរជាតិ ជាំសាងាំកាលពីរសៀលថ្ងៃទី២៩ កញា ២០១៥ ។

អ្នកទោសខ្មែរដែល អាជ្ញាធរថៃដោះលែងមានឈ្មោះ សុខ សេង ភេទប្រុស អាយុ១៦ឆ្នាំ មានទីលំនៅក្នុងភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ បានរៀបរាប់ថា កាលពីថ្ងៃទី០២ ធ្នូ ២០១៤ ខ្លួនបានឡើងភ្នំដងរែក ដោយមានគ្នីគ្នារាប់រយនាក់ ចូលតាមចំណុចថ្ម៣ដុំ ឆ្លងដែនចូលទៅក្នុងទឹកដី ថៃរុករកកាប់ឈើគ្រញួង ។

អ្នកទោសដដែលបានបន្តទៀតថា នៅវេលាម៉ោង២រសៀលថ្ងៃទី០២ ធ្នូ ២០១៤ ស្រាប់តែក្រុមទាហានសៀមបានបាញ់ជាច្រើនគ្រាប់ តែខ្លួនមិនបានដឹងថា មានអ្នករងរបួស ឬអ្នកស្លាប់ប៉ុន្មាននាក់ទេ ដោយសារតែខ្លួនត្រូវក្រុមទាហានថៃចាប់ខ្លួនយកទៅដាក់ នៅឯពន្ធធនាគារស្រុកខាន់តាឡាក់ ខេត្តស៊ីសាកេត ។

មន្ត្រីសមត្ថកិច្ចបម្រើការងារ នៅមាត់ច្រកទ្វារអន្តរជាតិ ជាំសាងាំបានឲ្យដឹងថា បន្ទាប់ពីអាជ្ញាធរថៃ បញ្ជូនអ្នកទោសខ្មែរម្នាក់មកឲ្យអាជ្ញាធរកម្ពុជាវិញ សមត្ថកិច្ចបានធ្វើការអប់រំ ហើយបានឲ្យត្រឡប់ទៅ ជួបជុំក្រុមគ្រួសារសាច់ញាតិរបស់ខ្លួនវិញនាថ្ងៃដដែល ៕