ស្រវឹងបង្កជម្លោះ ទាញកាំបិតកាប់គេ ជាប់ចោទពីបទប៉ុនប៉ងមនុស្សឃាត

ស្រវឹងបង្កជម្លោះ ទាញកាំបិតកាប់គេ ជាប់ចោទពីបទប៉ុនប៉ងមនុស្សឃាត

ខេត្តកំពង់ធំ ៖ បុរសម្នាក់ត្រូវបានសមត្ថកិច្ចនគរបាលស្រុកសណ្តាន់ ចាប់ខ្លួនបញ្ជូន ទៅកាន់ស្នងការដ្ឋាននគរបាលខេត្តកំពង់ធំកាលពីថ្ងៃទី៧ តុលា ២០១៥ ដោយចោទប្រកាន់ពីបទប៉ុនប៉ងមនុស្សឃាត ។

ជនសង្ស័យដែលត្រូវចាប់ខ្លួនឈ្មោះ តី ឡា ភេទប្រុស អាយុ២៧ឆ្នាំ រស់នៅភូមិស្វាយ ឃុំសណ្តាន់ ស្រុកសណ្តាន់ ខេត្តកំពង់ធំ ។ ចំណែកជនរងគ្រោះឈ្មោះ វ៉ាន់ សើ ភេទប្រុស អាយុ៣៦ឆ្នាំ និងប្រពន្ធឈ្មោះ ផេង សុខអ៊ីន អាយុ៣៣ឆ្នាំរស់ភូមិ-ឃុំជាមួយគ្នា ។

លោកវរសេនីយ៍ទោ ជា ពឿន នាយការិយាល័យព្រហ្មទ័ណ្ឌកម្រិតធ្ងន់ នៃស្នងការដ្ឋាននគរបាលខេត្តបានឲ្យដឹងថា បើតាមការស្រាវជ្រាវរបស់កម្លាំងសមត្ថកិច្ចបានដឹងថា ករណីអំពើហិង្សាដែលត្រូវជាប់ចោទពីបទប៉ុនប៉ងឃាតកម្មខាងលើបានកើតឡើង កាលពីវេលាម៉ោង១០ និង២០នាទីយប់ ថ្ងៃទី៥ តុលា ២០១៥ ស្ថិតក្នុងភូមិស្រុកចាស់ ឃុំសណ្តាន់ ស្រុកសណ្តាន់ ដែលបង្កឡើងដោយជនសង្ស័យឈ្មោះ តី ឡា ដែលធ្លាប់ឈ្លោះគ្នាជាមួយជនរងគ្រោះពីមុនមក ខណៈពេលជនសង្ស័យផឹកស្រាស្រវឹងក៏បង្កជម្លោះជាថ្មី ហើយក៏បានទាញកាំបិតកកុកស្ទុះទៅកាប់ជនរងគ្រោះ និងប្រពន្ធរបស់ជនរងគ្រោះតែម្តង ។

លោកវរសេនីយ៍ទោ ជា ពឿន បន្តទៀតថា ខណៈដែលជនសង្ស័យលើកកាំបិតកាប់ ជនរងគ្រោះជាប្តីក៏ស្ទុះចូលទៅចាប់ប្រតាយគ្នា បណ្តាលឲ្យដងកាំបិតកកុកចំកល់ពីលើក្បាលជនរងគ្រោះ ចំណែកផ្លែកាំបិតក៏ធ្លាក់ទៅចំស្មាខាងឆ្វេង និងចំជិតគុម្ពត្រចៀកខាងស្តាំរបស់ស្ត្រីជាប្រពន្ធរងរបួសស្រាល ។ នៅក្នុងពេលកំពុងតែប្រតាយប្រតប់គ្នានោះ ជនសង្ស័យបានព្យាយាមខាំទៅលើជនរងគ្រោះឈ្មោះ វ៉ាន់ សើ ដាច់សាច់២កន្លែងត្រង់ស្មាស្តាំ១កន្លែង និងដៃខាងឆ្វេង១កន្លែង ។ ក្រោយពេលបង្កហេតុរួច ជនសង្ស័យបានរត់គេចខ្លួនបាត់ រហូតដល់ម៉ោងជិត១២ថ្ងៃត្រង់ ថ្ងៃទី៦ខែ-ឆ្នាំដដែល ទើបសមត្ថកិច្ចឃាត់ខ្លួនបាន និងបញ្ជូនមកកាន់ស្នងការដ្ឋានខេត្តនៅថ្ងៃទី៧ តុលា ២០១៥ ដើម្បីចាត់ការបន្ត ៕