តារាសម្តែងតៃវ៉ាន់ Christine Kuo ភ័យរន្ធត់ជាខ្លាំងបន្ទាប់ពីអ្នកគាំទ្របាល់ទាត់ស៊ីលីចាប់ឱបថើប

តារាសម្តែងតៃវ៉ាន់ Christine Kuo ភ័យរន្ធត់ជាខ្លាំងបន្ទាប់ពីអ្នកគាំទ្របាល់ទាត់ស៊ីលីចាប់ឱបថើប

តារាសម្តែងកូនកាត់២សាសន៍តៃវ៉ាន់ កាណាដា វ័យ៣០ឆ្នាំ នាង Christine Kuo ត្រូវបានអ្នកគាំទ្របាល់ទាត់ក្រុមជម្រើសជាតិស៊ីលីចាប់ឱបថើបខណៈរូបនាងកំពុងធ្វើបទសម្ភាសន៍ក្នុងការថតខ្សែភាពយន្តនៅប្រទេសប្រេស៊ីល ។ ហេតុការណ៍នេះបានកើតឡើង កាលពីថ្ងៃទី២៦ ខែ មិថុនា ឆ្នាំ២០១៤ កន្លងទៅនេះដោយធ្វើឱ្យមនុស្សម្នាភ្ញាក់ផ្អើល ជាពិសេសរូបនាងផ្ទាល់តែម្តង ។

យោងតាមសារព័ត៌មាន ON.CC ឱ្យដឹងថា នាង Christine Kuo មិនបញ្ចេញប្រតិកម្មអ្វីតបតទេ ព្រោះនាងមិនចង់បង្ករឿង លើសពីនេះទៅទៀតនាងបារម្ភពីកម្មវិធីថតសម្តែងក្នុងប្រទេសប្រេស៊ីល ខ្លាចបាត់បង់ឱកាសដ៍ល្អមួយនេះ ។ នៅក្នុងបទសម្ភាសន៍ Christine Kuo និយាយទាំងទឹកមុខក្រៀមក្រំថា នាងខ្ញុំមិនបានស្គាល់អ្នកគាំទ្រអត្តចរិកខុសប្លែករូបនោះទេ ហើយក៍មិនបានប្រព្រឹត្តិអ្វីខុសឆ្គងចំពោះបុគ្គលណាម្នាក់ដែរ ។

នាងបានបន្ថែមថា មុនពេលកម្មវិធីថតឈុតសម្តែងក្នុងប្រទេសប្រេស៊ីល ខ្ញុំបានសញ្ជឹងគិតពីរឿងរ៉ាវមិនល្អៗដែលអាចកើតឡើងចំពោះរូបខ្ញុំ ខណៈពេលដែលអ្នកគាំទ្រកីឡាបាល់ទាត់នៅជុំវិញពិភពលោកមកទស្សនាព្រឹត្តិការណ៍ World Cup 2014 ក្នុងប្រទេសប្រេស៊ីលយ៉ាងច្រើនកុះករ ។ បន្ទាប់ពីកើតរឿងរា៉វនេះ ក្រុមការងារថតឈុតសម្តែងរបស់នាងមិនមានលទ្ធភាពស្វែងរក ឬ ចាប់អ្នកគាំទ្រដែលមានអត្តចរិកខុសប្លែករូបនោះទេ ព្រោះមានមនុស្សរាប់លាននាក់ស្លៀកពាក់សម្លៀកបំពាក់ដូចៗគ្នា ៕