ជីវិតក្មេងអនាថាមួយក្រុម រស់ដោយសារលួច

ជីវិតក្មេងអនាថាមួយក្រុម រស់ដោយសារលួច

ខេត្តព្រៃវែង ៖ ហេតុអ្វីបានជាមនុស្សកើតមក មានវាសនាខុសៗគ្នាយ៉ាងដូច្នេះ ? ជាការពិត ក្មេងៗទាំងអស់សុទ្ធតែមានឪពុកម្តាយ ហើយឪពុកម្តាយដែលបង្កើតកូនប្រុសស្រីឱ្យមានជីវិតជាមនុស្ស គប្បីមានតួនាទីចិញ្ចឹមបីបាច់ ថែរក្សាកូនប្រុសស្រីឱ្យរស់រានមានជីវិត ។ មិនតែប៉ុណ្ណោះ ត្រូវចេះបង្ហាត់បង្រៀនពួកគេតាំងពីកើតមក រហូតដល់អាយុបាន៥-៦ឆ្នាំ ឪពុកម្តាយត្រូវបញ្ជូនពួកគេទៅសាលារៀន ដើម្បីឱ្យទទួលបានចំណេះដឹង ពីលោកគ្រូអ្នកគ្រូ ។

ចុះហេតុអ្វីបានជាក្មេង១ក្រុមនេះ រស់បែបជាក្មេងអនាថាទៅវិញ ? ប្រភពព័ត៌មានពីប្រជាពលរដ្ឋ ពីអាជ្ញាធរភូមិ-ឃុំ បានឱ្យដឹងថា ក្មេងមួយក្រុមនេះមានប្រុសមានស្រីចំនួនប្រហែល១០នាក់ ហើយក៏មានឪពុកម្តាយដូចក្មេងឯទៀតៗដែរ តែឪពុកម្តាយទាំងនោះជាឪពុកម្តាយយកគ្នាតាមបែបអាវ៉ាសែ គិតតែសប្បាយខាងផ្លូវភេទ បង្កើតកូនមកក៏អាវ៉ាសែបែបនោះដែរ ។ នេះគឺជាចរិតរបស់ឪពុកម្តាយមួយចំនួនតូច ដែលបង្កើតកូនមកហើយ គ្មានការទទួលខុសត្រូវលើកូនប្រុសស្រីទាំងនោះ ដោយបណ្តែតបណ្តោយឱ្យពួកគេរស់តាមព្រេងវាសនា ដើរលួច ដើរសុំគេហូប ដើរដេកនៅតាមចិញ្ចើមផ្លូវ តាមហាងកាហ្វេ ឬតាមរង្វង់មូលសាធារណៈនៅអ្នកលឿងត្រើយខាងកើត ដោយគ្មានកើតទុក្ខ គ្មានខ្វល់អំពីវាសនាអនាគតរបស់កូនបន្តិចសោះឡើយ ។

ចំណែកក្មេងៗទាំងនោះនិយាយថា ពួកគេពិតជាមានឪពុកម្តាយ ។ ពួកគេមិនចង់រស់នៅរបៀបដូច្នេះទេ គេចង់រស់នៅដូចក្មេងដទៃ មានឪពុកម្តាយថ្នាក់ថ្នមបីបាច់ថែរក្សា ទំនុកបម្រុងគ្រប់បែបយ៉ាង ។ ឪពុកម្តាយបង្កើពួកគេមកហើយ បំបរបង់ចោល ឱ្យដើរសុំទានគេហូប ឬរកប្រាក់យកទៅឱ្យ បើមិនបានប្រាក់ទេ មិនឱ្យចូលផ្ទះ ។

ប្រជាពលរដ្ឋឱ្យដឹងថា ក្មេងៗទាំងនេះមានទីលំនៅក្នុងភូមិ៥ និងភូមិ៦ ឃុំព្រែកខ្សាយ «ខ» ស្រុកពាមរក៍ ។ ប្រជាពលរដ្ឋ អំពាវនាវសុំឱ្យអាជ្ញាធរភូមិ-ឃុំ មេត្តាជួយមើល ឬជួយចាត់វិធានការ ដោយហៅឪពុកម្តាយរបស់ក្មេងៗទាំងនោះមកណែនាំ កុំឱ្យបណ្តែតបណ្តោយកូនដើរអាវ៉ាសែ ដេកតាមផ្លូវ យប់ឡើងដើរលួចរបស់ទ្រព្យអ្នកស្រុក-ភូមិ ។ លុះថ្ងៃឡើងនាំគ្នាដេកតាមមុខហាងកាហ្វេយ៉ាងដូច្នេះ មិនសមរម្យទេ ៕