កំពង់ឆ្នាំង៖ កូនក្រមុំវិចបង្វិច រត់ចោលរោងការ នៅភូមិចារថ្មី ឃុំអណ្ដងស្នាយ ស្រុករលាប្អៀរ បានត្រឡប់មកវិញហើយ កាលពីថ្ងៃទី២៥ ខែមករា ឆ្នាំ២០១៦ កូនក្រមុំដែល រត់ចោលរោងការ ក្នុងថ្ងៃសូត្រមន្ត បានវិលត្រឡប់មកក្រាបសំពះសុំទោសម្តាយ និង ឪពុករបស់ខ្លួន បន្ទាប់ពីកូនក្រមុំរូបនេះ បានគេចខ្លួនអស់រយៈពេល៣ថ្ងៃ ទៅជាមួយ និងគូកំណាន់របស់ខ្លួននោះ ។

ស្ត្រីឈ្មោះផាន់ សិរី អាយុ៣៩ឆ្នាំត្រូវជាម្តាយ បានរៀបរាប់អោយដឹងថា ក្រោយពីសារព័ត៌ ក្នុងស្រុកបានចុះផ្សាយពីការបាត់ខ្លួនកូនស្រី ដែលជាកូនក្រមុំត្រៀម ចូលរោងការនោះ កូនស្រីរបស់គាត់បាន ត្រឡប់មកដល់វិញហើយ បន្ទាប់ពីគាត់បានអំពាវនាវ ដល់កូនអោយត្រឡប់មកផ្ទះ ដោយមិនប្រកាន់ទោសពៃ។

ស្ត្រីជាម្តាយបានប្រាប់ទៀតថា កាលពីថ្ងៃទី២៥ ខែមករា វេលាម៉ោងជាង៧ព្រឹក កូនស្រីរបស់គាត់បានមកក្រាបសុំទោស ពីកំហុសឆ្គងរបស់ខ្លួនដែល ប្រព្រឹត្តខុសកាលពីថ្ងៃទី២៣ ខែមករា ឆ្នាំ២០១៥កន្លងទៅ ដោយបានរត់ចោលរោងការ ។

នៅចំពោះមុខម្តាយ កញ្ញា សុខសិរីវឌ្ឍន៍ ដែលកូនក្រមុំ បានគេចខ្លួនថ្ងៃចូលរោងការនោះ បានក្រាបសំពះសុំទោស ដោយក្តីអាណិតមេត្តាពីម្តាយ និង ឪពុក អំពីទង្វើដែលមិនគួរ គប្បីធ្វើអោយ ញាតិផងគេស្តីថា ។ មូលហេតុដែលនាង រត់ចោលរោងការ គឺដោយសារតែនាងមាន ទំនាក់ទំនងស្នេហ៍ជាមួយនឹង បុរសឈ្មោះ ទក នេះទើបនឹងបានរយៈ ពេលជាង១ខែប៉ុណ្ណោះ ហើយបានស្រឡាញ់គ្នា ហើយក៏បានសម្រេចចិត្ត រត់ចោលរោងការតែម្តង ។

 ក្នុងរយៈពេល៣ថ្ងៃដែលកូនស្រីរបស់គាត់ដែលរត់ចោល រោងការនោះគឺបាន ទៅជាមួយនឹងបុរសម្នាក់ ឈ្មោះ ទក ហៅយ៉ា ដែលជាអ្នកធ្វើការនៅរោងចក្រ អឹម និង វ៉េជាមួយគ្នា ដែលក្នុងអំឡុងពេលនោះនាង(កូនស្រី) បានទៅភ្នំពេញ ។

ម្តាយកូនក្រមុំបានប្រាប់ទៀតថា គាត់មិនប្តឹងផ្តល់ ចំពោះបុរសឈ្មោះទក ហៅយ៉ា នោះទេ ដោយគ្រាន់តែសម្រុះសម្រួលគ្នា អោយបុរសដែលនាំ កូនស្រីចេញថ្លៃបណ្តាការ ដែលកូនកម្លោះប្រគល់ ជូនគាត់ចំនួន២០០០ដុលា្លរប៉ុណ្ណោះ ហើយនឹងរកពេលវេលាសម ស្របណាមួយដើម្បីរៀបចំផ្សំផ្គុំ កូនស្រីរបស់គាត់ ជាមួយនឹងបុរសឈ្មោះទក ដែលនាំកូនគាត់ចេញពីរោងការ ។

ស្ត្រីនេះបានប្រាប់ទៀតថា ចំណែកឯកភាគីកូនកំលោះដែលត្រៀមខ្លួនជាស្រេចសម្រាប់ ចូលរោងការនោះ ក៏មិនបានប្តឹងផ្តល់អ្វីដែរ គ្រាន់តែទាមទារ នូវជំនូនបណ្តាការដែល ប្រគល់ចំនួន២០០០ដុល្លារ តែប៉ុណ្ណោះ។

ផ្តល់សិទ្ធដោយ ដើមអម្ពិល