នារីគរថ្លង់ម្នាក់ទម្លាក់ចេញពី រថយន្តទាំងអាក្រាតកាយ

នារីគរថ្លង់ម្នាក់ទម្លាក់ចេញពី រថយន្តទាំងអាក្រាតកាយ

រាជធានីភ្នំពេញ ៖ នារីគរថ្លង់ម្នាក់ ត្រូវអ្នកដែលទើបស្គាល់គ្នានាំយកទៅប៉ងរំលោភសេពសន្ថវៈនៅក្នុងរថយន្ត តែមិនបានសម្រេច ក៏ត្រូវជនសង្ស័យទម្លាក់នាងពីលើរថយន្តទាំងខ្លួនប្រាណអាក្រាត ដែលហេតុការណ៍នេះ បង្កឱ្យមានការភ្ញាក់ផ្អើល កាលពីវេលាម៉ោង១០ និង៤០នាទីយប់ថ្ងៃទី២១ មេសា ២០១៦ នៅកន្លែងស្ងាត់ក្បាលជ្រោយ ក្បែរសណ្ឋាគារសុខា ក្នុងភូមិទី១ សង្កាត់ជ្រោយចង្វារ ខណ្ឌជ្រោយចង្វារ ។

នារីរងគ្រោះមានអាយុ២៣ឆ្នាំ ជាមនុស្សគ និងថ្លង់ ស្នាក់នៅផ្ទះជួល ក្នុងសង្កាត់ភ្នំពញថ្មី ខណ្ឌសែនសុខ មានសង្សារជាជនបរទេស និងមានលំនៅក្នុងខណ្ឌច្បារអំពៅ ។

តាមព័ត៌មានឱ្យដឹងថា មុនពេលកើតហេតុ គេឃើញនារីគរនោះ ត្រូវបានគេទម្លាក់ចេញពីក្នុងរថយន្តមួយគ្រឿង មិនចាំម៉ាកទាំងខ្លួនប្រាណអាក្រាត ។ ភ្លាមៗ ត្រូវបានអ្នកភូមិ នាំគ្នារកខោអាវឱ្យស្លៀក និងទាក់ទងគ្រួសារនាំទៅប្តឹងនគរបាលប៉ុស្តិ៍ ។

តាមរយៈអ្នកប្រែភាសាគរបានឱ្យដឹងថា នៅមុនពេលកើតហេតុ នាងធ្វើដំណើរទៅលេងមិត្តភក្តិស្រីៗ នៅម្តុំផ្សារសូរិយាម៉ល ហើយបានបាយជុំគ្នា ។ លុះយប់ជ្រៅ ក៏បានបែកផ្លូវគ្នាអស់ ហើយនាងត្រូវបានបុរសម្នាក់ ដែលទើបតែស្គាល់គ្នាតាមរយៈមិត្តភក្តិធានាជូនទៅផ្ទះតាមរថយន្ត ។

តាមនារីគរបន្តថា នៅយប់នោះ នាងត្រូវបុរសម្នាក់នោះនាំដើរលេងនៅម្តុំវត្តភ្នំ និងបន្តទៅជ្រោយចង្វារ (កន្លែងកើតហេតុ) ដែលជាកន្លែងស្ងាត់ ក៏បានឈប់រថយន្តលួងលោមសុំស្នេហ៍ និងបានចាប់សម្រាតសំលៀកបំពាក់ ក្នុងគោលបំណងរំលោភ តែនាងមិនព្រម ក៏ត្រូវបានគេច្របាច់.កវាយធ្វើបាប ហើយបើកទ្វារធាក់នាងទម្លាក់ចុះពីលើរថយន្តទាំងខ្លួនប្រាណអាក្រាត រួចបើករថយន្តទៅបាត់ ។

តាមប្រភពបន្តទៀតថា ភា្លមៗក៏ធ្វើឱ្យមានការភ្ញាក់ផ្អើលពីប្រជាពលរដ្ឋ នាំមកទៅប៉ុស្តិ៍នគរបាលរដ្ឋបាលជ្រោយចង្វារ ដើម្បីដាក់ពាក្យបណ្តឹង ។ តាមព័ត៌មានថា ជនដៃដល់ដែលប៉ងរំលោភនាងនោះ ត្រូវគេស្គាល់អត្តសញ្ញាណហើយ ។

រូបភាពនារីរងគ្រោះ

ប្រភព ៖ កោះសន្ដិភាព

ការចាប់អារម្មណ៍ខ្មែរឡូត៖

ករណីស្រដៀងនេះក៏ធ្លាប់បានកើតឡើង កាលពីខែមីនា ឆ្នាំ២០១៦ ដែលនារីម្នាក់អាយុ២១ឆ្នាំ និងមានសតិមិនគ្រប់បានអះអាងថា ត្រូវអ្នកបើកបររថយន្ត រួមទាំងព្រូមិនស្គាល់អត្តសញ្ញាណ ដាក់ថ្នាំងងុយដេក ក្នុងដបទឹកបរិសុទ្ធឱ្យផឹក រួចធ្វើសកម្មភាពចាប់រំលោភម្នាក់ ម្តងៗរហូតបានសំរេច ។ បន្ទាប់មក បានដឹកនារីរងគ្រោះមកទម្លាក់ចោលត្រង់កន្លែងស្ងាត់ ស្ថិតក្នុងភូមិកន្លែងកើត ឃុំល្វា ស្រុកចំការលើ ខេត្ដកំពង់ចាម។

បើតាមប្រភពពីលោកវេជ្ជបណ្ឌិត តាំង គឹមឆេង ប្រធានមន្ទីរពេទ្យបង្អែកស្រុកចំការលើបានឱ្យដឹងថា នាងត្រូវបានសមត្ថកិច្ចបញ្ជូនមក កាន់មន្ទីរពេទ្យ ។ ដោយនារីរងគ្រោះពិតជាត្រូវគេរំលោភពិតប្រាកដមែន បើផ្អែកតាមរយៈការពិនិត្យ ។ ក្រុមគ្រូពេទ្យបានបន្តោងសេរ៉ូមឱ្យ ដោយមិនមានអ្នកណាម្នាក់ នៅកំដរនោះទេ តែខាងលោកបានផ្តល់បាយ-ទឹក រហូតដល់នាងកម្លាំងដូចដើមវិញ ។

បើតាមការរៀបរាប់របស់នារីរងគ្រោះបន្ទាប់ពីនាងដឹងខ្លួននោះថា រូបនាងទៅចូលរួមក្នុងពិធីមង្គលការបងប្អូននៅខេត្តកំពង់ធំ តែមិនបានដេកទីនោះទេ គឺបានជិះរថយន្តតួរីស ពណ៌.ស១គ្រឿងត្រឡប់មកវិញ ដោយមានមនុស្សជិះជាច្រើននាក់ ។ ស្របពេលដែលមកដល់ត្រង់ចំណុចស្គន់ ស្រុកជើងព្រៃ អ្នកដំណើរបាននាំគ្នាចុះអស់ គឺនៅសល់តែនាង ក្នុងពេលនោះ ព្រូរថយន្តបានហុចទឹកបរិសុទ្ធ១ដប មកឱ្យផឹកស្រាប់តែមិនដឹងខ្លួនរហូត ។ ដូច្នេះ នាងសង្ស័យគេដាក់ថ្នាំងងុយ ដេកលាយក្នុងទឹក ហើយត្រូវអ្នកបើកបររ និងព្រូធ្វើសកម្មភាព ចាប់រំលោភ រួចដឹកមកទម្លាក់ចោលត្រង់ចំណុចខា ងលើក្នុងឃុំល្វា ស្រុកចំការលើ ។

លោកវរសេនីយ៍ត្រី អោម មុនីវណ្ណ អធិការនគរបាលស្រុកពញាក្រែកបានប្រាប់ឱ្យដឹងថា នារីរងគ្រោះគឺមានសតិមិនគ្រប់នោះទេ ដោយម្តាយស្លាប់ចោល រីឯឪពុកវិញមានប្រពន្ធថ្មីទៀត បានចាកចេញពីភូមិទៅរស់នៅខេត្តរតនគិរី ។ ហើយនារីរងគ្រោះ ត្រូវអង្គការមួយយកទៅចិញ្ចឹមនៅរាជធានីភ្នំពេញ ៕

រូបភាពនារីរងគ្រោះ