បុរសគួរតែប្រើ ផលិតផលផ្តល់សំណើមដល់ស្បែក ខុសពីស្ត្រីដែរឬទេ?

បុរសគួរតែប្រើ ផលិតផលផ្តល់សំណើមដល់ស្បែក ខុសពីស្ត្រីដែរឬទេ?

ស្បែករបស់យើងត្រូវបានបង្កើតឡើងដោយបីស្រទាប់។ ស្រទាប់ជ្រៅជាងគេឈ្មោះថា Subcutis ឬស្រទាប់ខ្លាញ់ក្រោមស្បែក) ហើយវាក៏ជាអ្នកជួយក្នុងការទប់ស្កាត់ការប្រែប្រួលសីតុណ្ហភាព និងរបួសដែរ។ ស្រទាប់កណ្តាលឈ្មោះថា Dermis ដែលវាផ្ទុកទៅដោយសរសៃប្រសាទ សរសៃឈាម ក្រពេញញើស និងគល់រោម។ ស្រទាប់ស្បែកក្រៅគេបង្អោះឈ្មោះថា Epidermis មានតួនាទីផ្តល់ជាភាពរឹងមាំដល់ស្បែក និងការពារកុំអោយជ្រាបទឹកចូលទៅក្នុងស្បែកបាន។ ស្រទាប់ខាងក្រៅនេះត្រូវបានគេអោយឈ្មោះថា Stratum Corneum ដែលវាមានប្រយោជន៍ចំពោះការលាបឡេ និងទឹកថ្នាំសម្រាប់គ្រប់គ្រង និងការពារស្បែកស្ងួត។

ខណៈពេលដែលរូបរាងកាយសម្ព័ន្ធស្បែកមនុស្សយើងមានលក្ខណៈដូចៗគ្នា វានៅតែមានលក្ខណៈខុសគ្នាមួយចំនួនដែរទាក់ទងនឹងដំណើរការធម្មតារបស់ស្បែកតាមភេទរបស់មនុស្សតែម្តង។ ចាប់តាំងពីកម្រិត pH ដល់អ័រម៉ូន សុទ្ធតែជារឿងដែលតម្រូវអោយមនុស្សប្រុសស្រីប្រើផលិតផលផ្តល់សំណើមខុសគ្នាទាំងអស់។

ភេទ
ស្រទាប់ស្បែកខាងក្រៅរបស់យើងមានរបស់មួយឈ្មោះថា Acid Mantle ដែលត្រូវបានង្កើតឡើងដោយការបញ្ចេញរបស់ក្រពេញញើស និងក្រពេញបញ្ចេញជាតិប្រេង។ អ្នកស្រាវជ្រាវបានរកឃើញនូវភាពខុសៗគ្នាជាច្រើននៅពេលយើងនិយាយដល់មុខងាររបស់ស្បែកបុរស និងស្ត្រី។ តើវាមានន័យដូចម្តេចទៅ? ស្បែកបុរសមានជាតិអាស៊ីតច្រើនជាងស្ត្រី ដោយយើងដឹងតាមរយៈការវាស់កម្រិត pH។ ជាមធ្យម pH ស្បែករបស់មនុស្សស្រីគឺ ៥,៦ (អាចតិចជាង ឬច្រើនជាងនេះ ០,៤) ចំណែកបុរសវិញគឺ ៤,៣ (អាចតិចជាង ឬច្រើនជាង ០,៤)។ ស្បែកដែលមានសុខភាពល្អ គឺមានចំនួន Acid Mantle ល្អដែលអាចគ្រប់គ្រងសំណើមដែលបាត់បង់ និងទប់ស្កាត់មេរោគដែលគ្រោះថ្នាក់កុំអោយចូលក្នុងខ្លួនបាន។ ស្បែកដែលមានសុខភាពល្អបំផុតក៏មានកម្រិត pH ក្រោម ៥ ដែរ ដូច្នេះ ការផ្តល់សំណើមដល់ស្បែករាល់ថ្ងៃជាមួយនឹងផលិតផល pH ដែលមានតុល្យភាព គឺជារឿងសំខាន់ដើម្បីកុំអោយបាត់បង់សំណើម បង្កើនជាតិទឹកដល់ស្បែក និងស្បែកមានសុខភាពល្អ។

តាមការសិក្សាមួយដែលបានចុះផ្សាយក្នុងសារព័ត៌មាន Optics Letters បានរកឃើញថា អាយុរបស់ស្បែកស្ត្រីមានលក្ខណៈលឿនជាងបុរស ហើយរឿងនេះក៏មិនត្រឹមតែកើតមានលើផ្ទៃស្បែកខាងលើទេ ស្រទាប់ស្បែកកណ្តាលក៏អញ្ចឹងដែរ។ កម្រិតនៃសារធាតុកូឡាជែន និងអេឡាស្ទីនដែលមានក្នុងស្រទាប់ Dermis នឹងថយចុះពេលដែលយើងអាយុច្រើន (ទាំងបុរស និងស្រី) ហើយរាងកាយនឹងផលិតសារធាតុនេះកាន់តែតិចៗទៅដែរ ប៉ុន្តែ ការបាត់បង់នេះនឹងកើតមានលើមនុស្សស្រីលឿនជាងគេបន្តិច។ បន្ទាប់មក ស្បែកនឹងចាប់ផ្តើមទៅជាស្តើង ស្ងួត និងបាត់បង់ភាពយឺត ព្រមទាំងមានលក្ខណៈដូចជាជ្រីវជ្រួញ និងយារ។ ស្បែកដែលចាស់ទៅតាមអាយុក៏ងាយនឹងខូចដោយសារតែបរិដ្ឋានជុំវិញខ្លួន សំណើម ការបង្ករោគដោយបាក់តេរី ប៉ុន្តែ អ្នកនឹងទទួលបានប្រយោជន៍ការពារវិញតាមរយៈផលិតផលផ្តល់សំណើមដល់ស្បែក ព្រោះវាមានផ្ទុកទៅដោយសារធាតុប្រឆាំងភាពចាស់ និងជ្រីវជ្រួញដូចជា Alpha-Hydroxy Acids និងសារធាតុដែលចម្រាញ់ចេញពីវីតាមីន A។

បញ្ហាអ័រម៉ូន
រឿងមួយទៀតដែលថា ស្បែកយើងខុសគ្នានោះ គឺអ័រម៉ូននេះហើយ។ បុរស និងស្ត្រីមានចំនួនអ័រម៉ូនចរាចរក្នុងរាងកាយខុសៗគ្នា ហើយចំពោះអ័រម៉ូន Androgens និង Estrogens មានឥទ្ធិពលច្រើនណាស់ទៅលើមុខងារាងកាយ រាប់ចាប់តាំងពីការបន្តពូជរហូតដល់ការបណ្តុះរោម ព្រមទាំងដំណើរការធម្មតារបស់ស្បែកទៀតផង។ អ្នកស្រាវជ្រាវបានរកឃើញថា ភាពខុសគ្នានៃចំនួនអ័រម៉ូន ជាពិសេសអ័រម៉ូន Androgens ដែលមានក្នុងរាងកាយបុរស គឺច្រើនជាងមនុស្សស្រី ដូច្នេះ វាធ្វើអោយស្បែកបុរសមានជាតិប្រេងច្រើនជាងស្ត្រីដែរ។

ស្បែកដែលមានជាតិប្រេង គួរតែផ្តល់សំណើមអោយដូចជាស្បែកស្ងួតដែរ ប៉ុន្តែ អ្វីដែលខុសគ្នានៅពេលនេះមិនមែននិយាយអំពីផលិតផលផ្តល់សំណើមដែលបង្កើតឡើងសម្រាប់បុរស និងស្ត្រីទេ តែជាការនិយាយអំពីធាតុផ្សំដែលមានក្នុងផលិតផលដែលត្រូវប្រើចំពោះស្បែកមានជាតិប្រេង និងស្បែកស្ងួតទៅវិញទេ។ ចំពោះស្បែកដែលមានជាតិប្រេងច្រើន អ្នកគួរតែរកផលិតផលផ្តល់សំណើមណាដែលគ្មានជាតិប្រេង និងមិនធ្វើអោយស្ទះរន្ធញើស។ ផលិតផលផ្តល់សំណើមដែលផ្ទុកទៅដោយធាតុផ្សំសម្រាប់ការពារជំងឺមុនដូចជា Salicylic Acid និង Benzoyl Peroxide ក៏មានប្រយោជន៍ដែរ។

នៅពេលបុរសមានអាយុកាន់តែច្រើន ចំនួនអ័រម៉ូនតេស្តូស្តេរ៉ូនពួកគេនឹងថយចុះ ហើយស្បែកក៏កាន់តែស្ងួតជាងមុនដែរ។ អ្នកដែលមានបញ្ហាស្បែកស្ងួត គួរតែស្វែងរកផលិផលណាដែលមានជាតិទឹកច្រើន និងធ្វើអោយស្បែកទន់ ដើម្បីអាចទាញជាតិទឹកចេញពីក្រោមស្បែកសម្រាប់ផ្តល់ជាសំណើមធម្មជាតិការពារស្បែក។ ផលិតផលដែលផ្ទុកទៅដោយសារធាតុ Petrolatum, Lanolin, Glycerin, Shea Butter និង Fatty Oils ដូចជាប្រេងអូលីវ ឬផ្លែបឺសុទ្ធតែមានប្រយោជន៍ចំពោះស្បែកស្ងួតទាំងអស់៕

ប្រភព៖ health.com.kh

មុន បន្ទាប់

មតិយោបល់