​Cover letter របស់​អ្នក​គឺជា​ឧបករណ៍​ដែល​ធ្វើឱ្យ​និយោជិក​ជឿ​ថា​ក្នុងចំណោម cover letter របស់​បេក្ខជន​ទាំងអស់ មានតែ​របស់​អ្នក​នោះ​ទេ​ដែល​គួរតែ​ត្រូវ​អាន​បន្ត​។ Cover letter របស់​អ្នក​ត្រូវ​ទាមទារ​តម្រូវឱ្យ​ចាប់យក​ចំណាប់អារម្មណ៍​របស់​និយោជិក បង្កើត​ទំនាក់ទំនង និង​បញ្ចុះបញ្ចូល​គាត់​ឱ្យ​ហៅ​អ្នក​ទៅ​សម្ភាសន៍​។ វា​គឺជា​ឱកាស​ដំបូង​របស់​អ្នក​ក្នុង​ការបង្កើត​ចំណាប់​អារម្មណ៍​ដ៏​ល្អ​។​

​ឈ្មោះ​បុគ្គល​ផ្ទាល់​

​ ​ខណៈ​ដែល​ការផ្តើម​ដែល​សរសេរ​ថា “​ជូន​ចំពោះ​លោក​/​លោកស្រី​” អាច​មានន័យ​សម្តៅ​ទៅលើ​មនុស្ស​គ្រប់គ្នា​ដែល​នឹង​អាន cover letter របស់​អ្នក ប៉ុន្តែ​វា​មិន​ភាព​បុគ្គល ហើយ​វា​បង្ហាញ​ថា​អ្នក​មិនបាន​ធ្វើ​ការស្រាវជ្រាវ​ដើម្បី​ស្វែងរក​ថា​តើ​នរណា​ជា​អ្នក​អានសំបុត្រ​របស់​អ្នកនោះ​ទេ​។ ប្រសិនបើ​ការផ្សព្វផ្សាយ​ព័ត៌មាន​មិន​បាន​ប្រាប់​ពី​ឈ្មោះ​របស់​អ្នកត្រួតពិនិត្យ​ទេ នោះ​អ្នក​អាច​ចូល​ទៅ​មើល​ក្នុង​គេហទំព័រ​របស់​ក្រុមហ៊ុន​បាន​។ ប្រសិនបើ​គេហទំព័រ​មិន​មាន​ប្រាប់​ឈ្មោះ​ទៀត អ្នក​អាច​ស្វែងរក​លេខ​ទូរស័ព្ទ​ហើយ​ទូរស័ព្ទ​ទៅ​សាកសួរ​ពី​ក្រុមហ៊ុន​បាន​។ សាកសួរ​អ្នក​ទទួល​ភ្ញៀវ​ដែល​ទទួល​ទូរស័ព្ទ​របស់​អ្នក​ពី​ឈ្មោះ​នៃ​ប្រធាន​ផ្នែក​ធនធានមនុស្ស​ឬ​អ្នក​ដែល​គ្រប់គ្រង​លើ​បញ្ជី​ការងារ​។ ចូរ​សួរ​ឱ្យបាន​ច្បាស់​ពី​ការប្រកប​ឈ្មោះ​ឱ្យបាន​ត្រឹមត្រូវ ហើយ​មិន​ត្រូវ​ស្ទាក់ស្ទើរ​ក្នុង​ការពន្យល់​ប្រាប់​ថា​ហេតុអ្វី​បានជា​អ្នក​ចង់​ដឹង​ពី​ព័ត៌មាន​ទាំងនោះ​ឡើយ​។ ចូរ​ប្រើ​តំណែង​ឬ​ឋានន្តរសក្តិ ប៉ុន្តែ​មិន​ត្រូវ​ប្រើពាក្យ “​កញ្ញា (Miss)” ឬ “​អ្នកស្រី (Mrs.)” នោះទេ ដើម្បី​ជៀសវាង​ពី​ការហៅ​ខុស​។ “Ms.” គឺជា​ពាក្យ​ទូទៅ​។​

​ការស្រាវជ្រាវ​បាន​ល្អ​

​ ​ត្រូវ​ដឹង​ថា​តើ​ក្រុមហ៊ុន​កំពុង​ស្វែងរក​អ្វី ដូច្នេះ​អ្នក​អាច​ពន្យល់​គេ​បាន​ថា​តើ​អ្នក​សាក​សម​នឹង​តម្រូវការ​របស់​គេ​ដោយ​បែបណា​។ ចូរ​មើល​ដោយ​ប្រយ័ត្នប្រយែង​នូវ​ភាសា​ដែល​គេ​ប្រើ​ក្នុង​ការផ្សព្វផ្សាយ​ព័ត៌មាន​ការងារ​។ កត់ចំណាំ​ពាក្យ​ដែល​គេ​ប្រើ ដូច្នេះ​អ្នក​អាច​ប្រើ​វា​ក្នុង cover letter របស់​អ្នក​។ ស្វែងយល់​ពី​ប្រវត្តិ​ក្រុមហ៊ុន កេរ្តិ៍ឈ្មោះ​របស់​ក្រុមហ៊ុន តើ​ក្រុមហ៊ុន​នោះ​ធ្វើ​អ្វីខ្លះ និង​គោលបំណង​របស់​ក្រុមហ៊ុន​។​

​ភស្តុតាង​បង្ហាញថា​អ្នក​សាក​សម​

​ ​ចូរ​ផ្តល់​ភស្តុតាង​ជា​ក់លាក់​ច្បាស់លាស់​ថា​ហេតុអ្វី​បានជា​អ្នក​សាក​សម​ទៅនឹង​តំណែង​មួយ​នោះ​។ មិន​ត្រូវ​គ្រាន់តែ​ប្រាប់​គេ​ថា​អ្នក​មាន​ជំនាញ​នោះទេ ត្រូវ​បង្ហាញ​គេ​ពី​បទ​ពិសោធន៍​ផ្ទាល់​ដែល​អ្នក​ប្រើ​ជំនាញ​នោះ​។​

​កែសម្រួល​ដើម្បី​ភាពត្រឹមត្រូវ​

​ ​Cover letter របស់​អ្នក​ត្រូវតែ​មាន​ភាពល្អ​ឥត​ខ្ចោះ​។ រាល់​ពាក្យ​ទាំងអស់​ត្រូវតែ​ប្រកប​ឱ្យបាន​ត្រឹមត្រូវ ហើយ​វេយ្យាករណ៍​ក្នុង​រាល់​ប្រយោគ​ត្រូវតែ​គ្មាន​កំហុស​សូម្បី​តែ​បន្តិច​។ ចូរ​ប្រើ​វេយ្យាករណ៍​ឱ្យបាន​សមស្រប និង​ជៀសវាង​ពាក្យ​កាត់ ឬ​ពាក្យ​បច្ចេកទេស​។ ចូរ​សុំឱ្យ​នរណាម្នាក់​អានសំបុត្រ​របស់​អ្នក ហើយ​ជួយ​រក​និង​កែ​កំហុស​។

ប្រភព៖ health.com.kh