គ្រប់គ្រងបញ្ហានៃការ ឈឺមេជើង

គ្រប់គ្រងបញ្ហានៃការ ឈឺមេជើង

អ្នកឯកទេសបាននិយាយថា ប្រសិនបើអ្នកមានការឈឺ និងហើមមេជើង ការថែទាំវាបានល្អអាចជួយអ្នកជៀសវាងពីការព្យាបាលធ្ងន់ធ្ងរជាច្រើននៅថ្ងៃក្រោយ។
វេជ្ជបណ្ឌិត ប្រ៊េន រ៉ូសេនហាល (Brent Rosenthal) ជាគ្រូពេទ្យឯកទេសឆ្អឹងនៃមជ្ឈមណ្ឌលវេជ្ជសាស្ត្រ CentraState បាននិយាយថា ការឈឺ និងហើមមេជើង គឺជាដុំដែលកើតមាននៅនឹងសន្លាក់នៃមេជើងនៅពេលដែលឆ្អឹង ឬជាលិកាចេញពីកន្លែង និងលាតសន្ធឹងលើសពីទីតាំងធម្មតានៃមេជើង។ ប្រសិនបើមិនព្យាបាលទេនោះ ការឈឺ និងហើមមេជើងអាចបណ្តាលអោយអ្នកជំងឺឈឺជាប់ និងអាចតម្រូវអោយធ្វើការវះកាត់ដើម្បីកែតម្រូវវា។

Rosenthal បាននិយាយថា ដើម្បីការពារបញ្ហានេះ អ្នកជំងឺត្រូវជៀសវាងពាក់ស្បែកជើងដែលមានកែងស្រួច និងកុំពាក់វាក្នុងរយៈពេលយូរក្នុងមួយថ្ងៃ។ អ្នកគួរតែដឹងពីទំហំស្បែកជើងរបស់អ្នក ដែលអាចកើនឡើងនៅពេលដែលអ្នកមានអាយុច្រើន ឡើងទម្ងន់ និងមានផ្ទៃពោះ។

ប្រសិនបើអ្នកហើម និងឈឺមេជើង សូមចាប់ផ្តើមពាក់ស្បែកជើងដែលទូលាយ។ ការទ្រាប់ស្បែកជើងអាចបន្ថយរោគសញ្ញា និងការពារវាពីការមានរោគសញ្ញាកាន់តែខ្លាំងឡើងៗ។

គាត់ក៏បានផ្តល់ដំបូន្មានអោយប្រើថ្នាំបំបាត់ការឈឺចាប់ដែលមានលក់នៅតាមទីផ្សារផងដែរ។ ប្រសិនបើវាហើមខ្លាំង ឬឈឺខ្លាំង សូមស្អំទឹកកកជាច្រើនដងក្នុងមួយថ្ងៃ។

ប្រសិនបើវិធីសាស្ត្រខាងលើនេះមិនជួយបានទេនោះ សូមទៅជួបគ្រូពេទ្យដែលជាអ្នកឯកទេសខាងបញ្ហានៃជើង និងកជើង។ គ្រូពេទ្យអាចចេញវេជ្ជបញ្ជាថ្នាំប្រឆាំងនឹងការរលាកដែលមិនមែនជាស្តេរ៉ូអ៊ីត ឬចាក់ថ្នាំករទីស៊ូនដើម្បីបន្ថយការឈឺ និងការរលាក។

ប្រសិនបើការព្យាបាលទាំងនេះបរាជ័យ ការវះកាត់អាចត្រូវបានធ្វើ ដើម្បីបន្ថយសម្ពាធ និងកែលំអឆ្អឹងមេជើង។ Rosenthal បាននិយាយថា ការជាសះស្បើយពីការវះកាត់ត្រូវចំណាយពេលយូរ ហើយការឈឺអាចមានរយៈពេលជាច្រើនសប្តាហ៍៕
ប្រភព: Health.com.kh

មុន បន្ទាប់

មតិយោបល់