ខ្លួនប្រាណយើង អាចបម្លែងខ្លាញ់អាក្រក់ទៅជាល្អបានក្រោយពីត្រូវនឹងភាពត្រជាក់

ខ្លួនប្រាណយើង អាចបម្លែងខ្លាញ់អាក្រក់ទៅជាល្អបានក្រោយពីត្រូវនឹងភាពត្រជាក់

ការស្រាវជ្រាវថ្មីមួយបានបង្ហាញថា សីតុណ្ហភាពត្រជាក់អាចជម្រុញខ្លាញ់មិនល្អដែលមាននៅនឹងភ្លៅ និងពោះអោយប្រែទៅជាខ្លាញ់ដែលដុតកាឡូរីទៅវិញ។

ប៉ុន្តែការធាត់ គឺជាឧបសគ្គនៃដំណើរការនេះ។

ខ្លាញ់របស់មនុស្សពេញវ័យភាគច្រើន ត្រូវបានដឹងថាជាខ្លាញ់ស ហើយគេជឿថា ទារកមានខ្លាញ់ត្នោតដែលលេចឡើងដើម្បីជួយរក្សាកម្តៅ។

ទោះជាយ៉ាងណាក៏ដោយ ការស្រាវជ្រាវពីមុនបានបង្ហាញថា មនុស្សពេញវ័យក៏មានខ្លាញ់ត្នោតមួយចំនួនផងដែរ។ បន្ទាប់មកការស្រាវជ្រាវលើកក្រោយៗក៏បានកំណត់ថា ខ្លាញ់ត្នោតដែលត្រូវបានរកឃើញលើមនុស្សពេញវ័យនោះ មិនដូចគ្នាទៅនឹងខ្លាញ់ត្នោតដែលមានលើទារកនោះទេ។

ក្រុមអ្នកស្រាវជ្រាវបានពន្យល់ថា ខ្លាញ់ត្នោតចំពោះទារកបានកើតឡើងពីសាច់ដុំ ប៉ុន្តែខ្លាញ់ត្នោតរបស់មនុស្សពេញវ័យ គឺជាខ្លាញ់ដែលបានកើតឡើងពីខ្លាញ់ស។

ចំពោះការស្រាវជ្រាវថ្មីក្រុមអ្នកស្រាវជ្រាវដែលត្រូវបានដឹកនាំដោយវេជ្ជបណ្ឌិត ហ្វីលីព គឺន (Philip Kern) បានប្រៀបធៀបខ្លាញ់នៅនឹងក្បាលពោះដែលត្រូវបានយកពីមនុស្ស៥៥នាក់អំឡុងពេលរដូវក្តៅ និងរដូវរងា។ ពួកគេក៏បានពិនិត្យល់ខ្លាញ់ភ្លៅដែលត្រូវបានយកពីមនុស្ស១៦នាក់ក្រោយពួកគេបានដាក់កញ្ចប់ទឹកកកលើស្បែករបស់ពួកគេរយៈពេល៣០នាទី។

ការស្រាវជ្រាវបានរកឃើញថា ខ្លាញ់ក្បាលពោះដែលត្រូវបានយកពីមនុស្សនៅក្នុងរដូវរងាមានកម្រិតខ្ពស់នៃការសម្គាល់ហ្សេនេទិចពីរសម្រាប់ខ្លាញ់ត្នោតជាងខ្លាញ់ក្បាលពោះដែលត្រូវបានយកពីមនុស្សនៅក្នុងរដូវក្តៅ។

អ្នកស្រាវជ្រាវក៏បានបន្តថា ខ្លាញ់ភ្លៅដែលត្រូវបានយកក្រោយពីពួកគេបានស្អំទឹកកកលើស្បែកនោះ ក៏មានការកើនឡើងកម្រិតសម្គាល់ហ្សេនេទិចបីដែលត្រូវបានផ្សារភ្ជាប់ទៅនឹងខ្លាញ់ត្នោតផងដែរ។

ទោះជាយ៉ាងណាក៏ដោយឥទ្ធិពលនៃការបង្កើតខ្លាញ់ត្នោតនេះត្រូវបានរារាំងចំពោះមនុស្សធាត់នេះដោយយោងតាមការស្រាវជ្រាវដែលត្រូវបានចេញផ្សាយនៅក្នុងកាសែត Journal of Clinical Endocrinology & Metabolism។

វេជ្ជបណ្ឌិត Kern បាននិយាយថា យើងនឹងពិនិត្យមើលថាតើមនុស្សពេញវ័យមានសមត្ថភាពដើម្បីបម្លែងខ្លាញ់សទៅជាខ្លាញ់ត្នោតបានឬយ៉ាងណានៅពេលដែលពួកគេស្ថិតនៅក្នុងអាកាសធាតុត្រជាក់នោះ។

ជាលិកាខ្លាញ់ត្នោត អាចប្រឆាំង និងទប់ទល់ការធាត់។ គាត់បានបន្ថែមថា វានឹងនាំអោយខ្លួនប្រាណដុតកាឡូរីដែលលើសជាជាងបម្លែងទៅជាជាលិកាខ្លាញ់បន្ថែម។

ការស្រាវជ្រាវពីមុនជាច្រើនបានបង្ហាញថាអាកាសធាតុត្រជាក់អាចជួយដុតកាឡូរីចំពោះមនុស្សដែលរួមមានការស្រាវជ្រាវមួយដែលបង្ហាញថាឥទ្ធិពលវាអាចត្រូវបានផ្សារភ្ជាប់ជាមួយនឹងខ្លាញ់ត្នោត។

ប៉ុន្តែអ្នកស្រាវជ្រាវបាននិយាយថាវាដូចជាឆាប់ពេកដែលថាអាកាសធាតុនឹងមានឥទ្ធិពលលើទម្ងន់របស់មនុស្ស៕
ប្រភព៖ health.com

មុន បន្ទាប់

មតិយោបល់