អាហារដែលល្អ សម្រាប់សុខភាពសក់

អាហារដែលល្អ សម្រាប់សុខភាពសក់

171

តើស្ត្រីគ្រប់រូប មានដឹងទេថា របបអាហារដែលអ្នកទទួលទានរាល់ថ្ងៃ មានឥទ្ធិពលទៅលើការលូតលាស់របស់សក់? តើហេតុអ្វីទៅ? នេះដោយសារតែ ជីវជាតិគ្រប់គ្រាន់ គឺជាគន្លឹះដ៏សំខាន់ ដើម្បីអាចទទួលបានការបំពេញមុខងារ ក្នុងរាងកាយបានយ៉ាងល្អ។ អ្វីដែលពិសេសនោះគឺថា សក់របស់អ្នក ត្រូវការជីវជាតិជាច្រើន ដើម្បីអាចចៀសផុតពីការខូច និងលូតលាស់បានវែង ព្រមទាំងរឹងមាំថែមទៀតផង។ សំណាងដែរ អ្នកស្រាវជ្រាវជាច្រើន បានធ្វើការតាមដាន នូវជីវជាតិទាំងអស់នេះ ហើយក៏រកឃើញអាហារមួយចំនួន ដែលផ្ទុកទៅដោយ ជីវជាតិសំខាន់ៗទាំងនេះដែរ។
ត្រីសាលម៉ុន
ត្រីសាលម៉ុន គឺជាអាហារមួយប្រភេទ ដែលផ្ទុកទៅដោយខ្លាញ់អាស៊ីតអូមេហ្គាបីច្រើន ហើយវាក៏ជាអ្នកជួយទ្រទ្រង់ ទាំងសុខភាពស្បែកក្បាល និងសរសៃសក់ ឱ្យលូតលាស់កាន់តែច្រើន និងបន្ថយការខូចខាត។
ស៊ុត
ជីវជាតិជាច្រើន ដែលមានក្នុងស៊ុត អាចជួយបង្កើនសុខភាពសក់ បានពីររបៀបនោះគឺ ការលាប និងទទួលទាន។ ប្រូតេអ៊ីន គឺជាហេតុផលដ៏ធំបំផុតរបស់ស៊ុត ក្នុងការជួយទៅចិញ្ចឹមសក់ និងពង្រឹងដល់ភាពរឹងមាំរបស់សក់តែម្តង។ ស៊ុត និងប្រេងអូលីវ ដែលប្រើសម្រាប់ធ្វើជាក្រែមអប់សក់ គឺជាវិធីដ៏ល្អមួយ ដើម្បីទទួលបានសក់ដ៏រឹងមាំ។
សាច់គោ
ទ្រឹស្តីមួយ ដែលទាក់ទងនឹងការជ្រុះសក់ គឺថា ភាគច្រើនបណ្តាលមកពី កង្វះជាតិដែក និងប្រូតេអ៊ីន។ សាច់ក្រហម គឺជាអាហារដ៏ល្អមួយ សម្រាប់ផ្តល់នូវជីវជាតិអស់ទាំងនេះ ហើយសក់ ក៏ពេញចិត្តនឹងទទួលយកវាដែរ។ វាត្រូវបានគេសម្គាល់ឃើញថា សាច់គោ នឹងជួយថែរក្សាលំហូរឈាម ទៅស្បែកក្បាល ទប់ស្កាត់ការជ្រុះសក់ និងបង្កើនការលូតលាស់របស់សក់។
ការ៉ុត
វីតាមីន A ដ៏ច្រើនរបស់ការ៉ុត បានធ្វើឱ្យវាក្លាយទៅជា មិត្តដ៏ល្អមិនអាចខ្វះបាន របស់សរសៃសក់អ្នក។ វីតាមីនមួយនេះ នឹងជួយជាតិប្រេងក្នុងស្បែកក្បាល មួយប្រភេទឈ្មោះថា Sebum សម្រាប់រក្សាសំណើម និងការពារពីការខូចខាតទៀតផង។ ដើម្បីទទួលបានឥទ្ធិពលដល់កំពូល ការ៉ុត គួរតែញ៉ាំឱ្យបានយ៉ាងហោចណាស់ ម្តងដែរក្នុងមួយសប្តាហ៍។ អ្នកអាចញ៉ាំការ៉ុតទាំងឆៅ និងឆ្អិនបានដូចគ្នា។
គ្រាប់ផ្កាឈូករ័ត្ន
នេះគឺជាអាហារមួយ ក្នុងចំណោមអាហារដ៏ល្អបំផុត សម្រាប់ជួយបង្កើនសុខភាពសក់។ ជីវជាតិជាច្រើនដូចជា ម៉ាញ៉េស្យូម ប្រូតេអ៊ីន ស័ង្គសី វីតាមីន E សេឡេញ៉ូម ជាតិដែក ប៉ូតាស្យូម ទង់ដែង ប៉ាយអូទីន វីតាមីន B និងកាល់ស្យូម សុទ្ធតែមានក្នុងគ្រាប់ផ្កាឈូករ័ត្នទាំងអស់។ អ្វីដែលជាដំណឹងល្អនោះគឺថា គ្រាប់ផ្កាឈូករ័ត្ន គឺជាអាហារសម្រន់ ដ៏មានឱជាតិរស និងផ្តល់សុខភាពទៀត។
ដំឡូងឈ្វា
សារធាតុ Beta-carotene ដែលមានក្នុងដំឡូងឈ្វា នឹងជួយដល់កោសិកា សម្រាប់ពន្លូតសក់ ឱ្យមានសុខភាពល្អបាន។ អង់ទីអុកស៊ីដង់ និងវីតាមីន A ក្នុងដំឡូងឈ្វា ក៏ដើរតួជាភ្នាកងារ ដ៏មានប្រយោជន៍ដល់សុខភាពសក់ដែរ។ នេះដោយសារតែវា ទៅទប់ស្កាត់ការពុកផុយ របស់សរសៃសក់ និងផ្តល់បន្ថែម នូវការលូតលាស់ស្បែក ដ៏ស្រស់ស្អែតទៀតផង។
ផ្លែបឺ
ផ្លែបឺ ផ្តល់នូវអត្ថប្រយោជន៍ ជាជាតិសំណើមដ៏ល្អខុសគេមួយ សម្រាប់ភាពរឹងមាំរបស់សក់ និងស្បែកក្បាល។ វាមិនខុសគ្នានឹងស៊ុតទេ អ្នកអាចយកផ្លែនេះ មកទទួលទាន និងលាបជាក្រែមអប់សក់ក៏បានដែរ។ វីតាមីន E, C និង B6 នឹងត្រូវបានរំលាយ នៅពេលអ្នកញ៉ាំផ្លែឈើមួយនេះ។ ការលាបផ្លែបឺលើសក់ក្បាល នឹងជួយថែរក្សាសក់ និងស្បែកក្បាលឱ្យមានសំណើម និងជំរុញដល់ការលូតលាស់៕

ត្រួតពិនិត្យដោយ www.health.com.kh ថ្ងៃទី25 ឧសភា ឆ្នាំ2015

មុន បន្ទាប់

មតិយោបល់