បុរសម្នាក់ ជិះម៉ូតូទៅលោតទឹក ស្ពានជ្រោយចង្វារថ្មី ប៉ងសម្លាប់ខ្លួន (មានវីដេអូ)

បុរសម្នាក់ ជិះម៉ូតូទៅលោតទឹក ស្ពានជ្រោយចង្វារថ្មី ប៉ងសម្លាប់ខ្លួន (មានវីដេអូ)

រាជធានីភ្នំពេញ ៖ បុរសវ័យចំណាស់ម្នាក់ បានជិះម៉ូតូទៅលោតទឹក នៅស្ពានជ្រោយចង្វារថ្មី ស្ថិតក្នុងសង្កាត់ស្រះចក ខណ្ឌដូនពេញ កាលពីវេលាម៉ោង១០ និង៤០នាទីព្រឹក តែត្រូវបានប៉ូលិស ហៅទូកនេសាទដែល នៅក្បែរនោះឱ្យជួយសង្គ្រោះទាន់ ។

ក្រោយពេលសង្គ្រោះបាន សមត្ថកិច្ចបានឱ្យដឹងថា បុរសវ័យដែលលោតទឹក ប៉ងសម្លាប់ខ្លួននេះ មានឈ្មោះ សុខ ហាក់ អាយុ៥១ឆ្នាំ មុខរបររត់ម៉ូតូឌុប ស្នាក់នៅផ្ទះលេខ៤៦៤ ផ្លូវលំ ភូមិត្រពាំងឈូក សង្កាត់ទឹកថ្លា ខណ្ឌសែនសុខ មានប្រពន្ធឈ្មោះនេត នួន ជាកម្មការិនីកាត់ដេរ ព្រមទាំងមានកូន៤នាក់ (ប្រុស២នាក់ ស្រី២នាក់) ។

មន្ត្រីនគរបាលការពារ ស្ពានជ្រោយចង្វារថ្មី បានឱ្យដឹងថា មុនពេលកើតហេតុ បុរសម្នាក់បានជិះម៉ូតូ ម៉ាកវ៉េវ ពណ៌ខ្មៅ ពាក់ស្លាកលេខ 1CQ-2371 ក្នុងទិសដៅពីលិចទៅកើត តាមផ្លូវថ្មើរជើង (ឡើងស្ពានបញ្ច្រាសទិសដៅ) លុះពេលជិតដល់ពាក់កណ្តាលស្ពាន ស្រាប់តែឈប់ម៉ូតូ ហើយលោតទឹកប៉ង សម្លាប់ខ្លួនតែម្តង តែត្រូវនគរបាល ការពារស្ពានហៅទូកនេសាទ ដែលនៅក្បែរនោះ ឱ្យជួយសង្គ្រោះ ទាន់ពេលវេលា ។

ក្រោយពេលសាកសួរ អស់ជាច្រើនម៉ោង បុរសដែលប៉ងលោតទឹក សម្លាប់ខ្លួនមិនព្រមឆ្លើយ ប្រាប់អ្វីទាំងអស់ ដោយគ្រាន់តែនិយាយថា គាត់មានវិបត្តិ ទើបមកលោតទឹក សម្លាប់ខ្លួនបែបនេះ ។ ពេលនេះសមត្ថកិច្ច កំពុងធ្វើការអប់រំណែនាំកុំឱ្យធ្វើ បែបនេះទៀត ហើយក៏អោយត្រឡប់ទៅផ្ទះវិញ ៕