អាមេរិក៖ ឆ្កែដែលវង្វេងបាត់ រយៈពេល៩ឆ្នាំ បានវិលមកជួបជុំ ជាមួយក្រុមគ្រួសារ ម្ចាស់ដើមរបស់ខ្លួនវិញ ធ្វើឲ្យម្ចាស់រំភើប ដល់ហូរទឹកភ្នែក។

Boozer កំពុងលិតមុខម្ចាស់

លោក Lloyd Goldston បានបាត់ឆ្កែពូជកីឡាកាសឈ្មោះ Boozer កាលពី៩ឆ្នាំមុន នៅពេលដែលគាត់បាន រើផ្ទះពីរដ្ឋ Tennessee ទៅរស់នៅ រដ្ឋ Alabama វិញ។

Boozer បានវង្វេងបាត់ខ្លួន រកមិនឃើញ បើទោះបីជាមាន ការប្រឹងប្រែង ស្វះស្វែងរកពីម្ចាស់ យ៉ាងណាក៏ដោយ។៩ឆ្នាំក្រោយមក ម្ចាស់ថ្មីដែលបានរើស Boozer ទៅចិញ្ចឹមបានសម្រេចចិត្ត ប្រគល់ឆ្កែដែលមាន អាយុ១០ឆ្នាំមួយនេះ ទៅកាន់ជំរកសត្វ The Foothills នៅរដ្ឋ Colorado ឲ្យជួយមើលថែវាបន្ត ពីព្រោះតែស្ថានភាព គ្រួសាររបស់គេមិនអាចបន្ត មើលថែទាំឆ្កែមួយនេះ ទៀតបាន។

ក្រោយមកជំរកសត្វ The Foothills ក៏បានស្វែងរក អត្តសញ្ញាណរបស់ Boozer ទើបដឹងថាឆ្កែមួយនេះ មិនមែនជាកម្មសិទ្ធិ របស់ម្ចាស់ ដែលនាំវាមកឡើយ គឺវាជាកម្មសិទ្ធិរបស់លោក Lloyd ទៅវិញទេ ទើបពួកគេធ្វើការទាក់ទង ទៅកាន់លោក Lloyd ដើម្បីមកទទួលយកវា ទៅមើលថែរក្សាវិញតែម្តង។ 

លោក Lloyd បានឲ្យដឹងថា លោកមានការភ្ញាក់ផ្អើលជាខ្លាំង នៅពេលដែលលឺថា ជំរកសត្វមួយនោះ មានឆ្កែដែលគាត់បានបាត់តាំងពីយូរមកហើយ។ គាត់បាននិយាយថា៖ "នៅពេលដែលខ្ញុំបានលឺវាភ្លាម ខ្ញុំបានយំ ជាពិសេសនៅពេលដែលខ្ញុំ បានឃើញរូបភាពរបស់វា ដែលពួកគេបានផ្ញើរមកឲ្យខ្ញុំ"។

លោក Lloyd បានធ្វើដំណើររយៈពេល ១៨ម៉ោងពីរដ្ឋ Alabama ជាមួយនឹងកូន ២នាក់ទៀត ដើម្បីទៅទទួលយក Boozer ដោយក្តីសប្បាយ លាយទឹកភ្នែក។ គាត់បានឲ្យដឹងថា នៅពេលដែលគាត់បាន ចូលទៅកាន់បន្ទប់នោះភ្លាម Boozer ក៏បានលោតទៅតោងដៃរបស់គាត់ ហើយវាក៏បានបក់កន្ទុយ និងលិតមុខរបស់គាត់ផងដែរ។ 

លោក Lloyd បានអោបឆ្កែរបស់គាត់ ហើយបាននិយាយ ដោយក្តីរំភើបលាយទឹកភ្នែកថា៖ "ឯងស្អាតណាស់! Boozer ស្វាគមន៍ជាថ្មីសម្លាញ់!"។ គាត់បាននិយាយទៀតថា៖ "ខ្ញុំសប្បាយចិត្តណាស់! វាមិនដែលទៅណាឆ្ងាយនោះទេ គឺវាស្ថិតនៅក្នុងបេះដូងរបស់យើងរហូត។ យើងមិនដែលភ្លេចវានោះឡើយ!"៕

សូមទស្សនាវីដេអូខាងក្រោម៖

ប្រភព thesun

ដោយ លូហាន

ខ្មែរឡូត