ជប៉ុន៖ យោងតាមប្រភពព័ត៌មាន បានឲ្យដឹងថា ការផ្ទុះយ៉ាងសន្ធោរសន្ធៅមួយ បានកើតឡើង នៅឯឃ្លាំងស្តុកឥវ៉ាន់ របស់កងទ័ពអាមេរិក ដែលមានទីតាំង ក្បែរទីក្រុងតូក្យូ បណ្តាលឲ្យមាន អណ្តាតភ្លើង ឆាបឆេះ និងផ្សែងខ្មៅ អួលអាប់ ពាសពេញ ផ្ទៃមេឃតែម្តង។

ហេតុការណ៏ផ្ទុះ ដ៏ខ្លាំងក្លានេះ បានកើតឡើង នៅព្រលឹម ថ្ងៃច័ន្ទ ទី២៤ ខែសីហា ឆ្នាំ២០១៥ នេះ នៅឯឃ្លាំង ស្តុកឥវ៉ាន់មួយ របស់កងទ័ពអាមេរិក ក្នុងទីក្រុង Sagamihara ស្ថិតនៅចំងាយ ប្រហែល៤០គីឡូម៉ែត្រ ពីទីក្រុងតូក្យូ នៃប្រទេសជប៉ុន ប៉ុន្តែមិនទាន់មាន ការរាយការណ៏ណាមួយ បញ្ជាក់ថា មានអ្នករងរបួសឡើយ។

ជាមួយគ្នានេះដែរ វីដេអូនៃហេតុការណ៏ ដ៏រន្ធត់នេះ ក៏បានចាក់ផ្សាយ នៅលើទូរទស្សន៏ របស់ប្រទេសជប៉ុន នៅអំឡុងម៉ោង ១២ និង ៤៥នាទីព្រឹក ផងដែរ ដោយបង្ហាញឲ្យឃើញ នូវទិដ្ឋភាពភ្លើងឆេះ យ៉ាងសន្ធោរសន្ធៅ បន្ទាប់ពីមានការផ្ទុះរួចមក។

សេចក្តីថ្លែងការណ៍មួយ ដែលចេញផ្សាយ ដោយកងទ័ពអាមេរិក នៅក្នុងប្រទេសជប៉ុន បាននិយាយថា «មិនមានសញ្ញាណាមួយ បង្ហាញថា មានអ្នករងរបួស នោះទេ ខណៈមានមនុស្ស ប្រមាណជា ៥៨០នាក់ ធ្វើការនៅឃ្លាំងនោះ។ អាគារមួយនោះ មិនមែនជាកន្លែង ផ្ទុកសម្ភារៈគ្រោះថ្នាក់ ដូចជាអាវុធយុទ្ធភ័ណ្ឌ ឬសម្ភារៈវិទ្យុសកម្ម អ្វីឡើយ។»

យ៉ាងណាមិញ មូលហេតុនៃការផ្ទុះនេះ កំពុងស្ថិតក្រោម ការស៊ើបអង្កេតនៅឡើយ ខណៈយោធាអាមេរិក ក៏កំពុងស្ថិតក្នុងដំណើរការ នៃការកំណត់ ចំនួនខូតខាត ផងដែរ៕

សូមទស្សនាវីដេអូនៅពេលកើតហេតុ៖

ប្រភព ៖ បរទេស

ដោយ ៖ ប៊ី

ខ្មែរឡូត