កាណាដា៖ វីដេអូដ៏គួរឲ្យខ្លោចផ្សាមួយ ត្រូវបានគេបង្ហោះឡើង ដោយក្នុងនោះ គឺជាទិដ្ឋភាព របស់សត្វខ្លាឃ្មុំ ដ៏កំសត់មួយក្បាល ដែលខំត្រដររត់ ទាំងត្រដាបត្រដួស ដើម្បីគេចពីការបាញ់សម្លាប់ ពីសំណាក់ពួកព្រាន តែចុងក្រោយ វានៅតែមិនអាច មានសំណាង រួចផុតពីសេចក្តីស្លាប់ បានដដែល។

យោងតាមប្រភពព័ត៌មាន បានឲ្យដឹងថា វីដេអូមួយនេះ ត្រូវបានបញ្ចេញ ដោយក្រុមអ្នកប្រឆាំង ការបរបាញ់សត្វ និងថែមទាំងបាន យកទៅបង្ហោះ នៅលើទំព័រហ្វេសប៊ុក របស់ក្រុមការពារ ជីវិតសត្វព្រៃ ដែលមានទីតាំង នៅក្នុងទីក្រុង វេនខូវើរ របស់ប្រទេសកាណាដា ផងដែរ។ ក្នុងនោះដែរ ក៏បានបង្ហាញអំពី ទិដ្ឋភាពនៃសត្វខ្លាឃ្មុំ ប្រភេទ Grizzly មួយក្បាល ត្រូវបានគេតាមប្រមាញ់ នៅឯខេត្ត British Columbia នៃប្រទេសកាណាដា ផ្ទាល់តែម្តង។

បើយើងមើលតាមវីដេអូនោះ យើងនឹងបានឃើញថា គ្រាប់កាំភ្លើងដំបូង ដែលបាញ់សំដៅ សត្វខ្លាឃ្មុំ គឺមិនទាន់ចំគោលដៅទេ តែក៏បានធ្វើឲ្យ ខ្លាឃ្មុំនោះ មានការភិតភ័យ ផងដែរ។ ក្រោយមក វាក៏ប្រញាប់រត់ ដើម្បីរកកន្លែងសុវត្ថិភាព ក្រោមសន្ធឹក នៃគ្រាប់កាំភ្លើង បន្តបន្ទាប់ ដែលបាញ់តម្រង់ទៅវា។

សត្វខ្លាឃ្មុំកំសត់នោះ កំពុងដើរតែឯង មុនពេលទទួលរង ការបាញ់ប្រហារ

ទោះជាយ៉ាងណាក៏ដោយ វានៅតែមិនអាច រត់គេចផុត ពីគ្រាប់កាំភ្លើង ជាច្រើនគ្រាប់នោះដែរ ខណៈវានៅតែតស៊ូ រត់ទាំងឈាមហូរ កក្លាក់ ឥតឈប់ឈរ ក្រោយត្រូវគ្រាប់កាំភ្លើង ជាច្រើនរួចមក។

ជាចុងក្រោយដោយសារ គ្មានកម្លាំងរត់ តទៅទៀត ខ្លួនប្រាណរបស់វា ក៏បានរមៀលធ្លាក់ចុះ តាមជម្រាលភ្នំ ដាច់ខ្យល់ងាប់ តែម្តង ដែលទិដ្ឋភាពនេះ គឺពិតជាខ្លោចផ្សា និងអាណិត ដល់សត្វខ្លាឃ្មុំនោះ ជាពន់ពេក។

គួរបញ្ជាក់ផងដែរថា វីដេអូមួយនេះ ​ត្រូវបានបង្ហោះឡើង ក្នុងគោលបំណង ដាស់តឿនស្មារតី របស់មនុស្ស ជាពិសេស ដើម្បីស្នើសុំ ឲ្យរដ្ឋាភិបាល ចាត់វិធានការណាមួយ ជុំវិញការបរបាញ់សត្វព្រៃ បែបនេះ

ក្នុងនោះដែរ បើយោងតាមស្ថិតិ យ៉ាងហោចណាស់ ក៏មានសត្វខ្លាឃ្មុំ ជាង៣០០ក្បាលដែរ ដែលត្រូវបាត់បង់ជីវិត ក្នុងរដូវកាលបរបាញ់ ដែលចាប់ផ្តើម ពីដើមខែមេសា ដល់ចុងខែឧសភា និងពីដើមខែតុលា ដល់ពាក់កណ្តាល ខែវិច្ឆិកា៕

ខាងក្រោមនេះ គឺជាវីដេអូ ដែលបង្ហាញពី សត្វខ្លាឃ្មុំនោះ ត្រូវគេតាមប្រមាញ់៖

រូបភាពរបស់ខ្លាឃ្មុំ ក្រោយពីត្រូវជាច្រើនគ្រាប់ រួចមក

ប្រភព៖ Metro

ដោយ៖ សុជាតិ

ខ្មែរឡូត