កូរ៉េខាងជើង៖ ពិភពលោក កើតមានការភ្ញាក់ផ្អើលសារជាថ្មី ម្តងទៀតហើយ ចំពោះប្រទេសកូរ៉េខាងជើង បន្ទាប់ពីបានធ្វើការប្រកាសគំរាម ថាប្រទេសរបស់ខ្លួន អាចមានសមត្ថភាព វាយប្រហារសហរដ្ឋអាមេរិក ដោយអាវុធនុយក្លេអ៊ែរ បានគ្រប់ពេល។

យោងតាមប្រភព សារព័ត៌មាន KCNA បានឲ្យដឹងថា ប្រទេសកូរ៉េខាងជើង បានប្រកាសបើកទ្វារ រោងចក្រ Yongbyon ដែលជាមូលដ្ឋាន ដ៏សំខាន់នៃ សារធាតុគីមី ភ្លុយតូនីញ៉ូម និងជាកន្លែងសម្រាប់ ផលិតអាវុធនុយក្លេអ៊ែរ ដ៏ធំមួយរបស់ប្រទេសនេះ ឡើងវិញហើយ បន្ទាប់ពីត្រូវបានបិទទ្វារ កាលពីឆ្នាំ២០០៧មក ហើយក្នុងសេចក្តីប្រកាសនោះ ក៏មានភ្ជាប់មកជាមួយ នូវការគំរាម វាយប្រហារទៅលើ សហរដ្ឋអាមេរិក បានគ្រប់ពេលទាំងអស់ផងដែរ។

លោក គីម ជុងអ៊ុន មេដឹកនាំនៃប្រទេស កូរ៉េខាងជើង

បើតាមការបញ្ជាក់ ពីប្រភពព័ត៌មានដដែលនេះ បានឲ្យដឹងទៀតថា មកទល់ពេលនេះ រោងចក្រផលិត អាវុធនុយក្លេអ៊ែរ Yongbyun កំពុងតែដំណើរការ យ៉ាងរលូនដោយ ក្នុងនោះគឺបានផលិតនូវ អាវុធនុយក្លេអ៊ែរ ជាច្រើនប្រកបដោយគុណភាព តែចំពោះឥទ្ធិពល និងផលប៉ះពាល់ របស់អាវុធទាំងនោះ មិនទាន់ត្រូវបាន បញ្ជាក់ឲ្យដឹងនៅឡើយនោះទេ។

ជម្លោះនិង ភាពតានតឹងនៅតាម តំបន់ព្រំដែនជាមួយនឹង ប្រទេសកូរ៉េខាងត្បូង ដែលបានកើតឡើង នាពេលកន្លងមក អាចជាកត្តាដ៏ចំបងមួយ ដែលនាំឲ្យរដ្ឋាភិបាល ដឹកនាំដោយលោក គីម ជុងអ៊ុន សម្រេចបើកទ្វារ រោងចក្រផលិត អាវុធនុយក្លេអ៊ែរ របស់ខ្លួនសារជាថ្មី។

គួរបញ្ជាក់ផងដែរថា ប្រទេសកូរ៉េខាងជើង បានអះអាង តាំងពីខែមុនមកម្ល៉េះ ថាខ្លួនបានត្រៀមនិងរៀបចំ រួចជាស្រេច សម្រាប់សង្រ្គាមនានា គិតចាប់ពីការ បាញ់បោះដាក់គ្នា នៅតំបន់ឧបទ្វីបកូរ៉េ ដែលទើបនឹងបញ្ចប់ ក្រោយពីមានការ ចរចាគ្នានាពេលកន្លង មកនេះ៕

លោក គីម ជុងអ៊ុន រួមជាមួយនឹងមន្ត្រីជាន់ខ្ពស់ នៃប្រទេសកូរ៉េខាងជើង

ប្រភព៖ Mirror

ដោយ៖ សុជាតិ

ខ្មែរឡូត