រថយន្តកុងតឺន័របុកម៉ូតូមួយគ្រឿង ស្លាប់បុរសម្នាក់ រួចហើយ ក្រឡាប់ធ្លាក់ជ្រោះ នៅចំណុចអូរត្រាវ

រថយន្តកុងតឺន័របុកម៉ូតូមួយគ្រឿង ស្លាប់បុរសម្នាក់ រួចហើយ ក្រឡាប់ធ្លាក់ជ្រោះ នៅចំណុចអូរត្រាវ

(ព្រះសីហនុ)៖ រថយន្តកុងតឺន័រមួយគ្រឿង បានរអិល ហើយក្រឡាប់ធ្លាក់ចូលជ្រោះ នៅចំណុចអូរត្រាវ ចូលក្រុងព្រះសីហនុ នាក្បាលព្រលប់ថ្ងៃទី២៧ ខែឧសភា ឆ្នាំ២០១៦នេះ ក្រោយពីរថយន្តយក្សមួយនេះ បានបើកបុកម៉ូតូមួយគ្រឿង ហើយជ្រុលទៅបុករថយន្តដឹកធ្យូងមួយគ្រឿងទៀត។

លោក អីុ សុខា ស្នងការរងនគរបាលខេត្តព្រះសីហនុ បានឲ្យដឹងថា មានគ្រោះថ្នាក់ចរាចរណ៍រថយន្តកុងតឺនរ័ បុកប៉ះជាមួយនឹងអ្នកបើកម៉ូតូ រួចហើយជ្រុលទៅប៉ះនឹងរថយន្តដឹកធ្យូងមួយគ្រឿងទៀត នៅផ្លូវចំណោតអូរត្រាវ ជិតចូលដល់ក្រុងព្រះសីហនុ ហើយបណ្តាលឲ្យអ្នកបើកម៉ូតូស្លាប់ភ្លាមៗ នៅកន្លែងកើតហេតុ។

លោកវរសេនីយ៍ឯក អុី សុខា បានបន្តទៀតថា គ្រោះថ្នាក់ចរាចរណ៍នេះ បណ្តាលឲ្យបុរសអ្នកបើកបរម៉ូតូម្នាក់ស្លាប់បាត់បង់ជីវិត រីឯរថយន្តកុងតឺនរ័ក្រឡាប់ និងរថយន្តដឹកធ្យូងមិនមានប៉ះពាល់ធ្ងន់ធ្ងរទេ។

បើតាមសមត្ថកិច្ចនៅកន្លែងកើតហេតុអោយដឹងផងដែរថា ស្ថានភាពផ្លូវនៅអូរត្រាវកន្លែងកើតហេតុ កំពុងមានភ្លៀង និងងងិត ដែលស្នើសុំឲ្យអ្នកបើកបរឆ្លងកាត់ បង្កើនការប្រុងប្រយត្ន័ផង៕

ប្រភព ៖ Fresh News

ការកត់សម្គាល់ខ្មែរឡូត៖

យ៉ាងណាមិញ កាលពីដើមខែកុម្ភៈ ឆ្នាំ២០១៦មុននេះ ក៏មានហេតុការណ៍ស្រដៀងនេះកើតឡើង ដែលមួយគ្រួសារ ទៅកម្សាន្តរមណីយដ្ឋាន ទឹកជ្រោះ ព្រះនិមិត្ត ក្រឡាប់រថយន្ត របួស៨នាក់។

យ៉ាងហោចណាស់ ក៏មានមនុស្សប្រុសស្រី ៨នាក់ រងរបួសធ្ងន់ស្រាល ដោយសារ ជួបគ្រោះថ្នាក់ចរាចរណ៍ ក្រឡាប់រថយន្ត កាលពីព្រឹកថ្ងៃទី២២ កុម្ភៈ នេះ ស្ថិតនៅតាម ដងផ្លូវក្រួសក្រហម ចំណុចថ្មកំបោរ ភូមិដងផ្លិត ឃុំកំពង់ស្រឡៅ ស្រុកឆែប ខណៈពេលដែលពួកគេ ធ្វើដំណើរទៅកម្សាន្ត រមណីយដ្ឋានទឹកជ្រោះព្រះ និមិត្ត ឃុំស្រឡៅពីរ ស្រុកឆែប ខេត្តព្រះវិហារ ។

មន្ត្រីសមត្ថកិច្ចបានឲ្យដឹងថា អ្នកបើកបរ ឈ្មោះ លី ហៀង អាយុ៣៩ឆ្នាំ រស់នៅរាជធានីភ្នំពេញ និងក្រុមគ្រួសារ ធ្វើដំណើរទៅកម្សាន្ត រមណីយដ្ឋានទឹកជ្រោះ ព្រះនិមិត្ត តែមិនទាន់ទៅដល់ គោលដៅផង លុះមកដល់ចំណុចកើតហេតុ តាមផ្លូវក្រួសក្រហម ខាងលើ ស្រាប់តែរថយន្ត រេចង្កូតក្រឡាប់ ទៅម្ខាងផ្លូវ បណ្តាលឱ្យអ្នកជិះ ក្នុងរថយន្តរងរបួសធ្ងន់ និងស្រាលតែម្តង ។

មន្ត្រីសមត្ថកិច្ច បានបន្តថា រថយន្តដែលជួបគ្រោះថ្នាក់ចរាចរណ៍ ម៉ាកឡិចស៊ីស ៤៧០ ពណ៌ស ពាក់ស្លាកលេខភ្នំពេញ 2P-1113 រងការខូចខាត យ៉ាងដំណំ រីឯអ្នករងគ្រោះ ទាំង៨នាក់នេះ មាន ១-ឈ្មោះ លី ហៀង អាយុ៣៩ឆ្នាំ ភេទប្រុស ២-ឈ្មោះ រិទ្ធិ សុផាវី អាយុ៣៦ឆ្នាំ ភេទស្រី ៣-ឈ្មោះ សុ ផល អាយុ៥១ឆ្នាំ ភេទស្រី ៤-ឈ្មោះ ស៊ុយ ដារ៉ារិទ្ធិ អាយុ៥២ឆ្នាំ ភេទប្រុស ៥-ឈ្មោះ លី ជូមីង អាយុ៨ឆ្នាំ ភេទប្រុស ៦-ឈ្មោះ រិទ្ធិ ថុនា អាយុ២៦ឆ្នាំ ភេទប្រុស ៧-ឈ្មោះ លី ជឺអ៊ីង អាយុ៦ឆ្នាំ ភេទស្រី និង៨-ឈ្មោះ លី ជឺអាន អាយុ៣ឆ្នាំ ភេទស្រី អ្នករងគ្រោះ ទាំង៨នាក់ខាងលើ រស់នៅរាជធានីភ្នំពេញ ។

សូមបញ្ជាក់ថា អ្នករងគ្រោះ ទាំង៨នាក់ ខាងលើ មានម្នាក់ឈ្មោះ រិទ្ធិ ថុនា រងរបួសបាក់ដៃខាងស្តាំ ចំណែក៧នាក់ទៀត រងរបួសស្រាល ៕

រូបភាពរថយន្ដក្រឡាប់